83 yachachiy

Jerusalenpa pirqasnin

¡SINCHITA llamkʼachkasqankuta qhawariy! Israelitasqa Jerusalenpa pirqasninta ruwachkanku. Nabucodonosor Jerusalenta thuñisqanmanta 152 wataña ruwakun. Chay kutipi, pirqasta urmachirqa, punkustataq ruphaykuchirqa. Israelitasqa chayamusqankumanta unaymanraq Jerusalenpa pirqasninta uqharirqanku.

¿Imaynatá paykuna mana pirqasniyuq llaqtapi kachkarqanku? Mana jarkʼasqachu karqanku. Enemigosninku maykʼaqllapis yaykuspa wañuchinkuman karqa. Nehemiastaq Jerusalenpa pirqasninta uqhariyta yanaparqa. ¿Pichus Nehemías kasqanta yachankichu?

Nehemías israelita karqa, Susa llaqtapi tiyakurqa, Mardoqueop Esterpa llaqtankupi. Payqa reypa jatun wasinpi tiyakuq. Ichapis, Mardoqueop Esterpa masin karqa. Chaywanpis, Bibliaqa mana Esterpa qusanwan llamkʼasqanta ninchu. Nehemiasqa rey Artajerjeswan llamkʼarqa.

¿Yuyarinkichu? Artajerjesqa kʼacha rey karqa. Payqa Jerusalenman kutinanpaq, Esdrasta quriwan yanaparqa Diospa wasinta kʼachanchananpaq. Esdrastaq Diospa wasillanta ruwarqa mana pirqastaqa. Kunan qhawarina Nehemías ruwasqanta.

Artajerjes Esdrasman qullqita qusqanmanta, 13 wataña kachkan. Nehemiasqa reyman vinota jaywaspa llamkʼaq. Chantapis vino mana venenoyuq kananta qhawanallantaq karqa. Kayqa may sumaq llamkʼay karqa.

Juk pʼunchay Hananí, wak israelitas ima, waqin Nehemiasta watukuq rirqanku. Paykuna israelitas llakiyta tiyakuchkasqankuta willarqanku. Jerusalenpa pirqasnin urmasqallaraq kasqanta nirqanku. Nehemías chayta uyarisqa mayta llakikuspa, Jehovamanta mañakurqa.

Juk pʼunchay reyqa Nehemiasta llakisqata rikuytawan tapurqa: ‘¿Imarayku kayjina llakisqa kachkanki?’, nispa. Nehemiastaq nirqa, Jerusalén may llakiy mana pirqasniyuq kasqanrayku, nispa. Reytaq ‘¿Imata munanki?’, nispa tapurqa.

Nehemías mañarikurqa: ‘Jerusalenman rinayta saqiway, ñuqa pirqasninta uqharimunaypaq’, nispa. Artajerjesqa may kʼacha runa karqa. Chayrayku rinanta saqirqa. Chantapis, pirqata uqharinankupaq kʼulluswan yanaparqa. Nehemías Jerusalenman chayaytawan, pirqasta uqhariq jamusqanta nirqa. Chayta uyariytawan llaqta mayta kusikuspa, ‘pirqata uqhariyta qallarinapacha’, nispa nirqa.

Israelitaspa enemigosnin pirqata uqharikuchkasqanta yachaytawan, jinata nispa Jerusalenman wicharirqanku: ‘Wicharimuspa, qamkunata wañuchisqayku, nitaq ima pirqatapis uqharinkichikchu’, nispa. Chayta uyariytawan Nehemías llamkʼaqkunaman espadasta, lanzasta ima jaywaytawan nirqa: ‘Ama manchachikunachu. Aylluykichikta, wasiykichikta ima jarkʼanapaq, maqanakuychik’, nispa.

Llaqtaqa mana manchachikurqachu. Paykuna maqanakunapaq tuta, pʼunchay wakichisqa karqanku, pirqatataq pirqallarqankupuni. Jinamanta 52 pʼunchayllapi tukurqanku. Kunanqa jarkʼasqa karqanku. Nehemías Esdraswan Dios kamachisqanta runaman yachachirqanku, llaqtataq kusisqa tiyakurqa.

Chaywanpis, mana ñawpaqjinachu karqa. Paykunaqa Persiamanta reyta kasukunanku karqa. Chaywanpis Jehovaqa juk musuq reyta kachamunanmanta nirqa, paytaq llaqtaman allin kawsayta qunan karqa. ¿Pitaq chay reyri? ¿Imaynatá Jallpʼapi allinta kawsachinqa? Chaytaqa 450 watamanraq yachakunan karqa. Chaymanta juk sumaq wawa nacekurqa. Chayta qhipan willaypi yachasunchik.

Nehemías 1 tʼaqamanta 6 tʼaqakama.