AKARA ana ra i te au angaanga pouroa e raveia ra i konei. E maata te angaanga a to Iseraela i te akatu i te au patu o Ierusalema. I te takore anga te Ariki ko Nebukaneza ia Ierusalema e 152 mataiti i mua ake, kua vavai aia i te au patu e kua tutungi i te au ngutupa o te oire ki te ai. Kare to Iseraela i akatu akaou ana i te au patu i to ratou oki mua anga mai ki te kainga mei Babulonia.

I toou manako, eaa ta te tangata e manako ra ia ratou e noo ra i konei pouroa teia au mataiti, kare e patu takapini i to ratou oire? Kare e tinamou to ratou manako i te nooanga. Mama ua i to ratou au enemi i te tamaki mai ia ratou. I teianei ra, te tauturu nei a Nehemia i te au tangata kia akatu akaou i te patu. Kua kite koe e koai a Nehemia?

E tangata Iseraela a Nehemia no te oire o Susana, te ngai i noo ei a Moredekai raua ko Esetera. E angaanga ana a Nehemia ki roto i te are o te ariki, e penei e oa meitaki aia no Moredekai e te Ariki Vaine ko Esetera. Inara kare te Pipiria i karanga ana e kua angaanga a Nehemia na te tane a Esetera, ko te Ariki ko Ahasueru. Kua angaanga ra aia na te ariki tei aru mai, ko te Ariki ko Aretekasaseta.

Akamaara ana, ko Aretekasaseta te ariki meitaki tei oronga kia Ezera i te moni pouroa kia apai ki Ierusalema no te akamanea i te iero o Iehova. Inara kare a Ezera i akatu ana i te au patu ngaangaa o te oire. Ka akara ana tatou e i akapeea i riro ei na Nehemia i rave i teia angaanga.

Kua pou te 13 mataiti i te oronga anga a Aretekasaseta i te moni kia Ezera ei akamanea i te iero. E rangatira raverave uaina a Nehemia no te Ariki ko Aretekasaseta. Te aiteanga nana e oronga ana te uaina a te ariki, e ka akapapu aia e kare tetai tangata e poitini i te ariki. E angaanga puapinga tikai te reira.

I na, tetai ra kua aere mai tetai mema o te kopu tangata o Nehemia ko Hanani e tetai au tangata ke mei te enua o Iseraela i te aravei ia Nehemia. Kua akakite ratou kiaia i te au manamanata o te Iseraela, e te vai ngaangaa ra rai te patu o Ierusalema. Kua taitaia tikai a Nehemia, e kua pure aia kia Iehova no runga i te reira.

I tetai ra kua kite mai te ariki i te mata maromaroa o Nehemia e kua ui mai e: ‘Eaa koe i akaraanga maromaroa ai?’ Kua akakite a Nehemia kiaia e no te mea tei roto ra rai a Ierusalema i te tu kino e kua ngaangaa te au patu. ‘Eaa taau ka inangaro iaku kia rave?’ i ui ei te ariki.

‘Tuku ana koe iaku kia aere ki Ierusalema,’ i karanga ai a Nehemia, ‘penei ka rauka iaku te akatu akaou i te au patu.’ E ariki takinga meitaki tikai te Ariki ko Aretekasaseta. Kua karanga aia e kia aere a Nehemia, e kua tauturu aia iaia kia tiki i tetai au rakau no te patuanga. Kare i roa i muri ake i to Nehemia tae anga ki Ierusalema, kua akakite aia ki te tangata no runga i tana au parani. Rekaia ratou e tona manako, e kua karanga e: ‘Ka akamata tatou i te patu.’

I te kite anga te au enemi o to Iseraela i te akatu angaia te patu, kua karanga ratou e: ‘Ka aere tatou ka ta ia ratou, e ka akamutu i ta ratou angaanga patuanga.’ Inara kua akarongo a Nehemia i teia, e kua oronga aia ki te aronga angaanga te au koke e te au korare. E kua karanga aia e: ‘Auraka e mataku i to tatou au enemi. E tamaki no to kotou au taeake, ta kotou tamariki, ta kotou au vaine, e to kotou au kainga.’

Kua ngakau toa tikai te tangata. Kua akapapa ua ratou i ta ratou apinga tamaki i te ao e te po, e kua rave ua atu rai i te angaanga patuanga. No reira i roto ua i te 52 ra kua oti te akatu i te au patu. Teianei kua manako tinamou ua te tangata i roto i te oire. Kua apii a Nehemia raua ko Ezera i te tangata i te ture a te Atua, e kua rekareka te tangata.

Tera ra kare rai i meitaki roa ake te au apinga mei to mua atu ana i te apaiia anga to Iseraela ei au mouauri ki Babulonia. Te tutaraia nei rai te tangata e te ariki o Peresia e kua anoanoia ratou kia tavini iaia. Inara kua taputou mai a Iehova e ka tono mai aia i tetai ariki ou, e na teia ariki e apai mai i te au ki te tangata. Koai ra teia ariki? Akapeea aia i te apai mai i te au ki te enua nei? Ka pou mei te 450 mataiti i mua ake ka apiiia ai no runga i teia. E oti te vai ra te anauanga puapinga roa atu o tetai pepe. Tera ra e tua ke rai te reira.