YANG’ANANI basa yonsene inacitwa pano. Aisrayeli akhadzudzumika na basa ya kumanga zingome za Yerusalemu. Mudafudza Mambo Nebukadinezara Yerusalemu m’piaka 152 nduli, iye agomola zingome na apisa misuwo mikulu ya nzinda. Pakutoma mudabwerera iwo kunyumba kubulukira ku Babiloni Aisrayeli hadamanga papswa zingome tayu.

Kodi imwe musanyerezera kuti mbumba ikhapibva tani kukhala maso piaka pyonsene ipi mukusowa zingome zakuzungulira nzinda wawo? Iyo nee ikhapibva yakukoyeka tayu. Anyamalwa ayo mbadapita mwakukhonda nensa mbaikutira. Mbwenye pakumalisira mamuna uyu Neyemia aphedza mbumba kumanga papswa zingome. Kodi musadziwa kuti mbani Neyemia?

Neyemia akhali Muisrayeli wakubuluka ku nzinda wa Susani, kule kukakhala Mordekai na Esteri. Neyemia akhaphata basa pa nyumba ya mambo, natenepa iye panango akhala xamwali wadidi wa Mordekai na Nyankhoda Esteri. Mbwenye Bibilya nkhabe longa kuti Neyemia aphatira basa mamuna wa Esteri, Mambo Ahaswero. Iye aphatira basa mambo wakutowerera, Mambo Artaxerxe.

Kumbukani kuti Artaxerxe akhali mambo wadidi adapasa Ezara kobiri yonsene ire kuti abwerere nayo ku Yerusalemu towera akasasanye templo ya Yahova. Mbwenye Ezara hadamanga zingome zakugomolwa za nzinda tayu. Tendeni tione kuti pyacitika tani kuti Neyemia acite basa ineyi.

Papita piaka 13 kutomera mudamala Artaxerxe kupasa Ezara kobiri towera akasasanye templo. M’nzidzi uneule Neyemia akhali nyakupereka pyakumwa wankulu wa Mambo Artaxerxe. Ipi pisafuna kulonga kuti iye akhapasa mambo vinyu yace, na akhaonesesa kuti nee munthu mbodzi ayesere kupasa nyongo mambo. Ikhali basa yakufunika kakamwe.

Inde, ntsiku inango Hanani, mbale wa Neyemia, na amuna anango a dziko ya Israyeli aenda kaona Neyemia. Iwo ampanga nyatwa zikhali na Aisrayeli, na makhaliro akugomolwa azingome za Yerusalemu. Ipi pyatsukwalisa kakamwe Neyemia, na iye aphembera kwa Yahova thangwi ya pyenepi.

Ntsiku inango mambo aona kuti Neyemia atsukwala, na iye abvunza: ‘Thangwi yanji iwe usaoneka ninga wakutsukwala kakamwe?’ Neyemia ampanga kuti thangwi Yerusalemu akhali m’makhaliro akuipa kakamwe na zingome zikhadagomolwa. Mambo abvunza: ‘Kodi usafuna kugumananji?’

Neyemia alonga: ‘Ndisiyeni ndiende ku Yerusalemu towera ndikamange papswa zingome.’ Mambo Artaxerxe akhali wakukoma ntima kakamwe. Iye alonga kuti Neyemia mbadakwanisa kuenda, na amphedza kugumana matabwa towera umangi ungasi. M’nzidzi wakucepa mudamala Neyemia kufika ku Yerusalemu, apanga mbumba pya manyerezero ace. Iyo yakomerwa na nyerezero, mbilonga: ‘Tendeni titome kumanga.’

Mudaona anyamalwa a Aisrayeli ngome kukwira, iwo alonga: ‘Tinadzakwira towera kuapha, mbitilimirisa basa ya kumanga.’ Mbwenye Neyemia abva pyenepi, mbapasa anyabasa masupada na madipa. Iye alonga: ‘Lekani kugopa anyamalwa athu. Menyani nkhondo thangwi ya abale anu, thangwi ya ananu, thangwi ya akazi anu, thangwi ya nyumba zanu.’

Mbumba ikhali yacipapo kakamwe. Iyo yakhala na mfuti zayo zakukhunganyika masikati na namasiku, mbapitiriza na kumanga. Zingome zamaliswa m’ntsiku 52 basi. Mphapo, mbumba mbidakwanisa kupibva yakukoyeka nkati mwa nzinda. Neyemia na Ezara apfunzisa mbumba mwambo wa Mulungu, na mbumba yakhala yakutsanzaya.

Mbwenye pinthu nee pikhali sawasawa Aisrayeli mbasati kuenda ku Babiloni ninga anyakaidi. Mbumba ikhatongwa na mambo wa Persiya na ikhafunika kuntumikira. Mbwenye Yahova akhadapikira kuti iye mbadadzatumiza mambo mupswa, na mambo unoyu mbadadzabweresa ntendere kwa mbumba. Kodi mbani mambo unoyu? Kodi iye mbadadzabweresa tani ntendere pa dziko yapantsi? Papita cifupi na piaka 450 mbipisati kudziwika pinango pya ipi. M’kupita kwa nzidzi pakhala kubalwa kwakufunika kakamwe kwa khombwani. Mbwenye iyi ndi mbiri inango.