Tantara 83

Rindrin’i Jerosalema

MBA henteo moa asa ataon’olo reto io. Sahìra manamboatse rindrin’i Jerosalema io ty olo. Fa nisy tao 152 lasa zay, ty nandravàn’i Nebokadnezara Mpanjaka an’i Jerosalema. Nosimbàne ty rindry sady noròane ty vavahady tamy tanà io tao, tami’zay. Fe tsy avy le nanamboatse rindry tanàn-droze io Israelita reo, laha vo tafimpòly baka a-Babylona ane.

Arake ty hevitsinao, mety ho nanao akore ty olo nipetrake ta-Jerosalema tao, laha fa tsy nisy rindry tanàn-droze io tanaty tao maro? Niasa ty sain-droze, satria afake nanafike noho namono an-droze mora avao, ty fahavalon-droze. Fe tamy farane le nisy lahilahy raike atao hoe Nehemia zay. Ie ro nanampy ty olo, mba hanamboatse rindry io ndraike. Ia Nehemia zao laha hainao?

Israelita baka amy tanà raike atao hoe Sosana zay Nehemia. Nipetrake tany kea Mordekay noho Estera. Niasa tan-trano-mpanjaka tao Nehemia, ka azo antoke fa mpinama soa roze amin’i Mordekay noho Estera Mpanjakavavy. Fe tsy mivòla ty Baiboly hoe niasa ho an’i Ahasoerosy Mpanjaka, valin’i Estera iny, Nehemia. Niasa tamin’i Artaksersesy Mpanjaka tao Nehemia. Io ty mpanjaka vaovao, nisolo an’i Ahasoerosy.

Tiaròvo, fa mpanjaka soa fanahy Artaksersesy. Ie aze nanome drala an’i Ezra handesy hanamboara tempolin’i Jehovah a-Jerosalema ane iny. Fe tsy nanamboatse rindry tanà rava io Ezra. Ndao ho henteantsika henany zao ty antone nahavy an’i Nehemia hanao asa io.

Fa 13 tao lasa zay, ty nanomezan’i Artaksersesy an’i Ezra drala hanamboara tempoly iny. Nehemia ro sefo’ty mpanday kôpin’i Artaksersesy Mpanjaka. Midika raha zay fa Nehemia ro mpanome divay ho an’i Mpanjaka io, ka nanao ze hahazòa antoke fa tsy nisy nanisy poìzy divay io. Asa sarotse asa io.

Niavy mba hisafo an’i Nehemia ty rahalahine atao hoe Hanany. Nisy lahilahy maromaro baka a-Israely ane niarake tamine. Nitantara tamin’i Nehemia roze fa mbo rava avao rindrin’i Jerosalema iny, ka sahìra biby Israelita reo ane. Nalahelo biby Nehemia laha fa naharé tantara reo, ka nivavake tamin’i Jehovah mikasike raha rezao ie.

Nihita mpanjaka iny, ndraike andro, fa nalahelo biby Nehemia, ka nanontany aze ie hoe: ‘Ino va raha mampalahelo anao io?’ Nivòla tamy mpanjaka iny Nehemia, fa sahìra biby ty olo mipetrake a-Jerosalema ane, satria mbo rava avao rindry tanà io. Nanontany aze ndraike mpanjaka iny hoe: ‘Ka ino moa ty raha ilànao?’

‘Mba engào handeha ho a-Jerosalema ane lahy aho’, hoy ty asan’i Nehemia, ‘soa ho afake hanamboatse rindry io.’ Soa fanahy biby Artaksersesy Mpanjaka. Nengàne handeha Nehemia, sady nanampy aze kea ie mba hahita hazo, azo anamboara rindry io. Laha fa niavy ta-Jerosalema tany Nehemia, tafara atoy, le nambarane tamy vahoake reo ty fomba hanamboara rindry io. Nitea vahoake reny hevitsin’i Nehemia zay, ka hoy ty asan-droze iaby hoe: ‘Ndao hanomboke ami’zay tsika.’

Laha fa nihita fahavalon’Israelita reo fa nihaniakatse rindry iny, le hoy ty asan-droze: ‘Ndao tsika handeha hanafike Israelita reo, ka hamono an-droze, ami’zay mijàno asa io.’ Fe nirén’i Nehemia raha zay, ka nameane sabatsy noho lefo iaby mpiasane reny. Hoy ty asan’i Nehemia: ‘Ka matahotse fahavalontsika reo nareo. Mialìa ho ahi’ty rahalahinareo, ho ahi’ty ananareo, ho ahi’ty valinareo noho ho ahi’ty tranonareo.’

Nana herim-po olo reo. Nataon-droze paré avao sabatsy noho lefon-droze reny, ndre andro ndre haly. Notohizan-droze soa fanamboara rindry iny. Afake 52 andro tafara atoy le vita rindry io. Tsy natahotse sasy ty olo tan-tanà tao. Nampianatse ty olo ty lalà-Ndranahare Nehemia noho Ezra, ka faly biby ty olo iaby.

Fe mbo tsy nitovy tami’ty fiaìna taloha’ty nanandesa Israelita reo ho andevo ta-Babylona tany ty fiaìnan-droze henany zao. Nanompo ty mpanjakan’i Persia Israelita reo, satria ie ro mbo nitarike an-droze. Fe nampitamà Jehovah fa handefa mpanjaka hafa. Ka mpanjaka io ro handay fiadàna ho ahi’ty vahoake. Ia va mpanjaka io? Amy fomba manao akore ro hanandesane fiadàna an-tany etoy? Afake 450 tao, vo nihay ty mikasike tantara io. Bakeo haterake ajà kelikele miavake raike zay. Fe mbo tantara hafa kea io.

Nehemia toko voalohane zisiky amy toko faha-6.