ASE ubuke lomsebenti lowentiwa lapha. Ema-Israyeli akha tindvonga taseJerusalema. Ngalesikhatsi iNkhosi Nebukhadnezari ibhubhisa liJerusalema eminyakeni lengu-152 leyendlulile, yabhidlita tindvonga yashisa nemasango alelidolobha. Ema-Israyeli awazange atakhe tindvonga ngalesikhatsi nje abuya eBhabhulona.

Ucabanga kutsi bativa njani bantfu ngekuhlala yonkhe leminyaka kulelidolobha lelingenatindvonga? Bativa bangakavikeleki. Titsa tabo betingangena melula futsi tibahlasele. Kodvwa ekugcineni Nehemiya wasita labantfu kutsi bakhe kabusha letindvonga. Uyati kutsi abengubani Nehemiya?

AbengumIsrayeli lobekahlala edolobheni laseSusa, lapho Modekhayi na-Esta bebahlala khona. Nehemiya abesebenta endlini yenkhosi, ngako kungenteka kutsi abengumngani lomkhulu waModekhayi neNdlovukati lengu-Esta. Kodvwa liBhayibheli alisho kutsi Nehemiya abesebentela indvodza ya-Esta leyiNkhosi Ahashiveroshi. Abesebentela iNkhosi leyalandzela lengu-Athazeksesi.

Khumbula phela kutsi Athazeksesi abeyinkhosi lelungile leyaniketa Ezra imali yekuyolungisa lithempeli laJehova eJerusalema. Kodvwa Ezra akazange atakhe tindvonga talelidolobha letatibhidlikile. Ase sibone kutsi kwenteka njani kutsi Nehemiya kubenguye lowenta lomsebenti.

Kwase kwendlule iminyaka lengu-13 Athazeksesi anikete Ezra imali yekuyolungisa lithempeli. Nehemiya abesangumphatsi wetitja teNkhosi Athazeksesi ngalesosikhatsi. Loku kusho kutsi kwakunguye lopha inkhosi liwayini, futsi aciniseke kutsi kute lofakela inkhosi shevu. Lona kwakungumsebenti lobalulekile.

Ngalelinye lilanga, umnakabo Nehemiya longuHanani kanye nalamanye emadvodza aka-Israyeli, bavakashela Nehemiya. Bamtjela ngetinkinga ema-Israyeli labenato, nekutsi tindvonga taseJerusalema tatisolo tibhidlikile. Kwamvisa buhlungu kakhulu loko Nehemiya, futsi wathandaza kuJehova ngalendzaba.

Ngalelinye lilanga inkhosi yabona kutsi Nehemiya abephatseke kabi. Ngako yambuta yatsi: ‘Kwentiwa yini kutsi buso bakho bubukeke bukhatsatekile?’ Watsi kungoba liJerusalema lisesimweni lesibi, futsi netidvonga talo tidzilikile. Inkhosi yambuta yatsi: ‘Ufuna ngikwenteleni?’

Nehemiya watsi: ‘Ngicela ungivumele ngiye eJerusalema, ngiyotivusa kabusha letindvonga.’ INkhosi Athazeksesi yayinemusa. Ngako yatsi kuNehemiya akahambe, futsi yamsita kutsi atfole netingondvo tekwenta lomunye walomsebenti. Nakefika eJerusalema Nehemiya wabatjela labantfu kutsi ufuna takhiwe njani letindvonga. Bajabula baze batsi: “Asivele sicalise nyalo kwakha kabusha.”

Titsa tema-Israyeli natibona tindvonga tiphakama, tatsi: ‘Sitawuhamba siyobabulala, futsi siwumise lomsebenti wabo.’ Kodvwa Nehemiya nakeva loko, waniketa letisebenti tinkemba netikhali. Watsi kuto: ‘Ningabesabi, lwelani bomnakenu, bantfwana benu, bafati benu kanye nemiti yenu.’

Bantfu baba nesibindzi. Batigcina tikhali tabo tilungile busuku nemini, futsi bachubeka nekwakha. Ngemuva kwemalanga langu-52, bacedza kutakha letindvonga. Bativa bavikelekile ekhatsi kulelidolobha. Nehemiya na-Ezra bafundzisa bantfu umtsetfo waNkulunkulu, futsi bajabula kakhulu bantfu.

Kodvwa simo sasisolo singafanani njengalesikhatsi ema-Israyeli atfunjelwa eBhabhulona. Bantfu bebabuswa yinkhosi yasePheresiya, futsi kwakufanele bayikhonte. Jehova wetsembisa kutsi utawutfumela inkhosi lensha, futsi iletse kuthula kubantfu. Ngubani lenkhosi? Itakuletsa kanjani kuthula emhlabeni? Kwendlula iminyaka lengu-450 ngembi kwekutsi kwatiwe lokunyenti ngayo. Ngako kwatalwa umntfwana lobalulekile. Kodvwa leyo ngulenye indzaba lesitawucoca ngayo.