¡ATAYÁÁ ra̱ʼkhá tháán gakhi̱i̱ kuwa ruñajunʼ gi̱i̱! Xa̱bu̱ israelitas nuni̱i̱ xtátsí ndrígóo Jerusalén. Ninújngoo mbá 152 tsiguʼ nákha̱ Nabucodonosor niʼni gámbáa Jerusalén, ga̱jma̱a̱ niʼningudi xtátsí ndrígóo ga̱jma̱a̱ nitsiká xkrugoo xuajin. Israelitas táxuxi̱i̱ xtátsí índo̱ ikhiin nitangi̱i̱n mbu̱júu̱ náa Babilonia.

Xú káʼnii nikuwa ikhiin xúgíʼ tsiguʼ rí nándáa xtátsí náa mbajndi xuajin rá. Ikhiin nikuwa ga̱jma̱a̱ gamíi. Ramingíjyúu rí xa̱bu̱ bi̱ guáʼdáá gajmiún sia̱nʼ maguwáʼ muxnún. Mu nda̱wa̱á kayuʼ nduʼyáá xa̱biya̱ bugi̱, Nehemías, rí xtáa rambáñun xa̱bu̱ muni̱i̱ mbu̱júu̱ xtátsí ndrígóo Jerusalén. Lá natayáá ikháánʼ tsáa xa̱biya̱ ni̱ndxu̱u̱ Nehemías ráʼ.

Nehemías ñajunʼ mbáa israelita bi̱ na̱ʼkha̱ náa xuajin Susa, náa xtáa Mardoqueo ga̱jma̱a̱ Ester. Nehemías niñajunʼ náa palacio ndrígóo rey, mbáa ni̱jkha̱nú nimbáxu̱u̱ májánʼ wéñuʼ ga̱jma̱a̱ Mardoqueo ga̱jma̱a̱ Ester. Mú Biblia tséʼthi rí Nehemías nixtáa rañajunʼ náa rey Asuero, ajmbio̱o̱ Ester. Niñajunʼ ga̱jma̱a̱ imba̱a̱ rey bi̱ niʼtáñajunʼ nda̱wa̱á, bi̱ nagumbiʼyuu Artajerjes.

Garmáʼáan a̱jkia̱nʼ, Artajerjes ñajunʼ rey májánʼ bi̱ nixnúu Esdras xúgíʼ mbújkha̱a̱ mu maʼga̱ kagu̱u̱ náa Jerusalén ga̱jma̱a̱ maʼni májánʼ templo ndrígóo Jeobá. Mú, Esdras na̱nguá niʼni̱i̱ xtátsí rí niguámbáa náa xuajin. Guʼyáá xú káʼnii nirígá rí Nehemías niʼni ñajunʼ rígi̱.

Ninújngoo má 13 tsiguʼ rí Artajerjes nixnúu mbújkha̱a̱ Esdras mu maʼni̱i̱ templo. Rí xúgi̱ Nehemías ñajunʼ bi̱ phú kayá edxu̱u̱ náa xa̱bu̱ coperos ndrígóo rey. Ikhaa naguxiʼñáanʼ vino maga̱a̱n rey ga̱jma̱a̱ ndaʼyoo májánʼ rí xágiʼdoo thana. Ni̱ndxu̱u̱ mbá ñajunʼ rí gíʼdoo wéñuʼ numuu.

Mbóo mbiʼi Hanani ndxájuu Nehemías ga̱jma̱a̱ eʼwíínʼ xa̱bu̱ bi̱ kuwa náa ku̱ba̱ʼ ndrígóo Israel naguwáʼ gúyaa Nehemías. Nutháán xkujndu rí guáʼdáá israelitas, ga̱jma̱a̱ rí xtátsí ndrígóo Jerusalén xóó tséguma̱a̱. Nehemías naxtáa gíná wéñuʼ, ga̱jma̱a̱ naʼtájkháan náa Jeobá ga̱jma̱a̱ numuu rígi̱.

Mbóo mbiʼi rey ndaʼyoo rí Nehemías xtáa gíná, ga̱jma̱a̱ naraxu̱u̱: ‹Náa numuu rí xtaa gíná rá.› Nehemías naʼthúu̱n rí xtáa gíná numuu dí raʼkhí xtáa rarígá náa Jerusalén ga̱jma̱a̱ rí tséguma̱a̱ xtátsí rí niguámbáa. Rey naraxu̱u̱: ‹Ndiéjunʼ eyaaʼ rá.›

Nehemías eʼthí: ‹Atatsíñuʼ maʼgá náa Jerusalén, mu ma̱ndoo mani̱i̱ xtátsí›. Ra̱ʼkhá tháán májánʼ a̱jkiu̱u̱n Artajerjes. Naʼthúu̱n Nehemías rí ma̱ndoo maʼga̱, ga̱jma̱a̱ nambáyúu mbayáaʼ nguátha xajpa mu majmuu náa mañajunʼ. Nguátha igu̱nʼ nda̱wa̱á rí na̱jkha̱nú náa Jerusalén, Nehemías naʼthúún xa̱bu̱ xuajin awan rí niríyaʼ maʼni. Xa̱bu̱ nanigu̱nʼ rí nudxawíín ga̱jma̱a̱ nuthi: ‹Mugíʼdi̱i̱ muñejunʼ›.

Índo̱ xa̱bu̱ bi̱ guáʼdáá sia̱nʼ gajmiún israelitas nduyáá rí xtátsí na̱jkha̱ rawáxe̱, nuthi: ‹Matsimulúʼ muradíin ga̱jma̱a̱ ní xúniʼñúunʼ muñajunʼ›. Índo̱ Nehemías naʼdxun rígi̱ naxnún chídí ga̱jma̱a̱ kúdú xa̱bu̱ bi̱ nuñajunʼ ga̱jma̱a̱ naʼthí: ‹Xámiñalaʼ kuñu̱u̱n xa̱bu̱ bi̱ guáʼdáá sianʼ. Guxnamijná ga̱jma̱a̱ numún angialaʼ, ejñalaʼ, guʼyalaʼ, ga̱jma̱a̱ guʼwálaʼ›.

Xa̱bu̱ xuajin na̱nguá miñun kayuʼ. Ikhiin guáʼdáá xawii ajua̱nʼ mbiʼíí mbruʼun ga̱jma̱a̱ nuñajunʼ má xúʼko̱. Ikha jngó, i̱ndó 52 mbiʼi eʼni rí naguámbu̱u̱n runi̱i̱ xtátsí. Rí xúgi̱ nándáa gamíi náa xuajin. Nehemías ga̱jma̱a̱ Esdras nusngúún xa̱bu̱ xtángoo ndrígóo Dios, ga̱jma̱a̱ xa̱bu̱ xuajin kuwa gagi.

Mú nánguá ni̱ndxu̱u̱ xóo nákha̱ ginii, nákha̱ nigún kudiin israelitas xóo esclavos náa Babilonia. Rey bi̱ xtáa náa Persia naʼtañajunʼ ga̱jma̱a̱ xa̱bu̱ xuajin gíʼmaa dí munimbu̱u̱n náa ikhaa. Mú Jeobá nikudaminaʼ rí ikhaa gákunguanʼ mbáa rey nuxi̱ʼ, ga̱jma̱a̱ rey bugi̱ gáʼkha̱ kayóo rí tsímáá náa xa̱bu̱ xuajin. Tsáa ñajunʼ bugi̱ rá. Xú káʼnii gáʼkha̱ kayóo rí tsímáá naa tsu̱du̱u̱ Ku̱ba̱ʼ rá. Nanújngoo mbá 450 tsiguʼ nákha̱ xóó tsíjmañulú itháan ga̱jma̱a̱ numuu rígi̱. Ikhú narígá mbá rí gíʼdoo wéñuʼ numuu, rí nagumaa mbáa ada̱. Mú rígi̱ ñajunʼ imba̱ historia.