¡KAʼAKXILHTI unu, tliwakga skujmakgolh kristianos! Li Israel tlawamakgolh xpatsaps Jerusalén. Ay titaxtunit 152  kata akxni Nabucodonosor, lakxtlawalh xpatsaps chu laklhkuyumilh xmalakcha Jerusalén. Li Israel nitunkun tsukukgolh kaxtlawakgoy xpatsaps nema litamakgtayay kachikin akxni taspitkgolh kJerusalén.

¿La lakpuwana wix pi makgkatsikgoy umakgolh kata akxni kachikin nikgalhiy xpatsaps nema nalitamakgtaya? Pekuankgoy. Wantiku ni kaʼakxilhputun nituwa nakamakgniy. Chu uku akxilhmaw uma chixku Nehemías, kamakgtayama kristianos natlawaparakgoy uma xpatsaps Jerusalén. ¿Katsiya wix tiku Nehemías?

Nehemías li Israel, anta wi kkachikin wanikan Susa, na anta wi Mardoqueo chu Ester. Nehemías skuja anta kxchik mapakgsina, wa xlakata max lu tlan xkatalalin Mardoqueo chu Ester. Pero Biblia ni wan komo Nehemías xtaskuja Asuero xchixku Ester. Wantiku xtaskuja wa mapakgsina nema tawi alistalh, Artajerjes.

Kalakapastakti, Artajerjes tlan likatsiy, xla wa mapakgsina wantiku maxkilh Esdras tumin xlakata nalitlawakan xtemplo Jehová kJerusalén. Pero Esdras nitu kaxtlawama xpatsaps kachikin nema xlakxlakgonit. Kaʼakxilhwi la tlawalh Nehemías xlakata tlan natlaway xpatsaps Jerusalén.

Ay titaxtunit akgkututu kata akxni mapakgsina Artajerjes maxkilh Esdras tumin xlakata nalikaxtlawakan templo. Chu uku Nehemías wa xapuxku wantiku mujuniy xvino mapakgsina. Mujuniy xvino chu kuentajtlaway pi ni nakgalhiy veneno, uma taskujut lu xlakaskinka.

Akgtum kilhtamaku Hananí xtala Nehemías chu amakgapitsi lakchixkuwin xalak Israel minkgolh lakgapaxialhnankgoy. Wanikgoy xtaʼakglhuwitkan li Israel chu na wanikgolh pi xpatsaps Jerusalén chuntiya lakxlakgonit. Nehemías lu lilipuwan chu wanilh Jehová tuku xlilipuwama.

Akgtum kilhtamaku mapakgsina akxilhli pi Nehemías xlipuwama chu kgalhskilh: ¿Tuku lilipuwana? Nehemías kgalhtilh chu wanilh pi nitlan wi Jerusalén chu lakxlakgonit xpatsaps. Mapakgsina waniy: ¿Tuku lakpuwana natlawaya?

Kakimaxki talakaskin nakan kJerusalén wan Nehemías chuna tlan nakkaxtlaway xpatsaps Jerusalén. Artajerjes lu tlan likatsiy. Chu waniy Nehemías pi tlan naʼan chu makgtayalh xlakata tlan natekgsa pakglhat nema namaklakaskin xlakata nalitlawakan xpatsaps Jerusalén. Akxni ni lhuwa kilhtamaku xtitaxtunit akxni Nehemías chalh kJerusalén kawanilh kachikin wantuku xlakpuwanit natlaway. Li Israel tlan akxilhkgoy chu wankgoy: Kamatsukiw uma taskujut.

Akxni akxilhkgolh wantiku nixkaʼakxilhputun li Israel pi xpatsaps Jerusalén lu tlan xtaxtumacha, wankgoy: Naʼanaw chu nakamakgniyaw chu nakamalakgachokgoniyaw xtaskujutkan. Akxni Nehemías katsilh uma kamaxkilh wantiku xtlawamakgolh uma taskujut xespadajkan chu xlanzajkan chu kawaniy pi nikapekuankgolh. Kakalakgmaxtutit mi natalankan, minkaman chu milakpuskatinkan chu minchikkan.

Xputumkan kachikin ni pekuankgoy. Tantaku chu tantaskaka xkgalhikgoy xespadajkan chu xlanzajkan chu chuntiya xtlawamakgolh xpatsaps Jerusalén. Wa xlakata 52 kilhtamaku limatlanikgolh patsaps. Chu uku nialh pekuankgoy kachikin. Nehemías chu Esdras masiyakgoy xlimapakgsin Dios chu kachikin lu paxuwakgoy.

Pero nina chuna wilakgolh la pulana akxni nina axkalinkan kBabilonia. Mapakgsina xalak Persia mapakgsinan kJerusalén chu kachikin wa skujnanikgoy. Pero Jehová wanit pi namakamin xasasti mapakgsina wantiku nakaliminiy wantuku lu xatlan. ¿Tiku ama mapakgsina? ¿Chu la natlaway xlakata tlan nawiliy Katiyatni? Pulana natitaxtuy 450 kata chu nalichuwinanaw uma. Chu akxni takgatsilh tama kata lakachilh aktsu skgata nema nixtachuna la amakgapitsi. Pero uma tuku lalh, alistalh nakatsiyaw.