LUKIM bikpela wok ol man i mekim. Ol Israel i wokim banis bilong Jerusalem. Inap 152 yia paslain long dispela taim King Nebukatnesar i bagarapim Jerusalem, em i bin brukim banis na kukim ol dua bilong taun. Taim ol Israel i lusim Babilon na i kam bek long Jerusalem, ol i no bin wokim gen banis.

Insait long olgeta dispela yia ol manmeri bin sindaun long taun i no gat banis, olsem na yu ting ol i bin pilim olsem wanem? Ol i pret. Ol birua inap kam na bagarapim ol. Tasol nau Nehemia i helpim ol long wokim gen banis. Yu save Nehemia em i husat?

Nehemia em i wanpela man Israel na em i stap long taun Susa, em ples Mordekai na Esta i stap long en. Nehemia i wok long haus bilong king, olsem na ating em i gutpela pren bilong Mordekai na Kwin Esta. Tasol Baibel i no tok Nehemia i mekim wok bilong man bilong Esta, em King Serksis, nogat. Em i bin mekim wok bilong narapela king i kamap bihain, em King Artaserksis.

Tingim, Artaserksis em i dispela gutpela king husat i bin givim bikpela mani long Esra bilong karim i go long Jerusalem na stretim gut haus lotu bilong Jehova. Tasol Esra i no bin wokim banis bilong Jerusalem. Orait nau yumi ken stori long olsem wanem na Nehemia i mekim dispela wok.

Kirap long taim Artaserksis i bin givim mani long Esra bilong stretim haus lotu na i kam inap long dispela taim, inap 13 yia i lus pinis. Nehemia i stap bosboi bilong wain long haus bilong King Artaserksis. Em i save givim wain long king, na lukautim gut, nogut wanpela birua i putim marasin nogut long en. Dispela i wanpela bikpela wok tru.

Orait wanpela taim, brata bilong Nehemia, em Hanani, na sampela man moa ol i lusim Israel na i kam lukim Nehemia. Ol i tokim Nehemia long ol hevi i painim ol Israel, na long banis bilong Jerusalem i bagarap i stap. Nehemia i harim dispela tok na em i bel hevi tru na em i beten long Jehova long dispela samting.

Bihain king i lukim olsem Nehemia i bel hevi na em i tok: ‘Bilong wanem yu bel hevi?’ Nehemia i tokim king olsem em i bel hevi, long wanem, Jerusalem wantaim banis bilong en i bagarap i stap. King i tok: ‘Yu laik mekim wanem?’

Nehemia i tok: ‘Larim mi i go long Jerusalem na bai mi inap wokim gen banis bilong taun.’ King Artaserksis i gat gutpela pasin tru. Em i orait long Nehemia i ken i go, na em i helpim Nehemia long kisim ol plang bilong wokim banis. Liklik taim bihain long Nehemia i kamap long Jerusalem, em i tokim ol Israel long wok em i laik mekim. Ol manmeri i amamas na ol i tok: ‘Yumi kirap nau na mekim dispela wok.’

Taim ol birua i lukim ol Israel i kirap long wokim banis, ol i tok: ‘Bai yumi go kilim ol i dai, na pasim dispela wok.’ Tasol Nehemia i harim tok long dispela samting, na em i givim bainat na spia long ol lain i mekim wok. Na em i tok: ‘Yupela i no ken pret long ol birua bilong yumi. Tingim ol brata, na meri pikinini, na haus bilong yupela na mekim pait.’

Ol manmeri i strongim bel. Long san na nait ol i save putim ol spia na bainat i stap redi, na ol i wok i go. Olsem na insait long 52 de tasol ol i pinisim wok bilong sanapim banis. Nau ol manmeri i stap insait long taun ol inap i stap bel isi. Nehemia na Esra i lainim ol manmeri long ol lo bilong God, na ol manmeri i amamas.

Tasol ol samting i no stap wankain olsem long bipo, paslain long ol Israel i go kalabus long Babilon. King bilong Persia i bosim ol manmeri na ol i mas mekim wok bilong em. Tasol Jehova i bin tok promis long salim wanpela nupela king i kam, na dispela king bai kamapim gutaim. Dispela king em i husat? Olsem wanem em bai kamapim gutaim long graun? Inap 450 yia bihain ol i kisim save long dispela samting. Long dispela taim wanpela pikinini i kamap, na dispela em i bikpela samting tru. Tasol yumi bai stori long dispela samting long bihain.