¡KʼELAVIL ti toj tsots ta x-abtejik liʼe! Yakal ta svaʼanik smuroaltak Jerusalén li j-israeletike. Lokʼ xa 152 jabil kʼalaluk la xchikʼbe stiʼ xchiʼuk la slilinbe komel smuroaltak Jerusalén li Nabucodonosore. Kʼalaluk lokʼik tal ta Babilonia li j-israeletike muʼyuk la xchaʼvaʼanik ta anil li smuroaltak Jerusalene.

¿Kʼu van x-elan chaʼi sbaik xa naʼ li j-israeletik ti chʼabal smuroaltak li slumalike? Ta xiʼik. Yuʼun mu vokoluk ch-och li yajkontraike. Pe tana liʼ ne te chkiltik jun vinik, jaʼ sbi Nehemías, yakal tskolta j-israeletik sventa chchaʼvaʼanik li smuroaltak Jerusalene. ¿Mi xa naʼ buchʼu li vinik ti jaʼ sbi Nehemiase?

Li Nehemiase jaʼ j-israelal vinik ti lik tal ta jteklum Susae, jaʼ li bu nakal Mardoqueo xchiʼuk Estere. Te toʼox ch-abtej ta sna ajvalil , jech oxal xuʼ jnoptik ti lek van skʼopon sbaik xchiʼuk li Mardoqueo xchiʼuk li Estere. Pe li Vivliae chal ti maʼuk abtej ta stojolal li ajvalil Asueroe, jaʼ xkaltik li smalal Estere. Jaʼ abtej ta stojolal Artajerjes li xkʼexol ajvalil Asueroe.

Vuleso ta ajol, li Artajerjese jaʼ li lekil ajvalil ti la jyakʼbe takʼin Esdras sventa chichʼ batel ta Jerusalene, li takʼin taje jaʼ ti la jyichʼ tunesel sventa alakʼuk sba xkom li xchʼulna Jeovae. Pe li Esdrase, muʼyuk bu la svaʼan li smuroaltak Jerusalene. Jkʼeltikik kʼuxi jaʼ la svaʼan li Nehemíase.

Li Esdrase oy xa ta oxlajuneb jabil ti akʼbat takʼin yuʼun Artajerjes sventa alakʼuk sba xkom li chʼulnae. Tana liʼe, li Nehemiase jaʼ bankilal j-akʼ yalel tsʼusub ta stojolal li ajvalile. Jaʼ ta skolbe yaʼlel stsʼusub li ajvalile, jaʼ ta spas reva mi chʼabal svenenoal. Jaʼ jun tsatsal abtel li yabtele.

Jun kʼakʼal li xchiʼil ta vokʼel li Nehemías, ti jaʼ sbi Hanani xchiʼuk yantik viniketik ti likemik ta yosilal Israele tal skʼelik li Nehemiase. La jyalbeik kʼux-elan svokol li j-israeletike, xchiʼuk noxtok ti yokel to jinem li smuroaltak Jerusalene. Lik yat yoʼonton li Nehemiase, vaʼun la skʼopon Jeova ta sventa taje.

Jun kʼakʼale, ilat yuʼun ajvalil ti yakal ta xat yoʼonton li Nehemiase, jech oxal xi jakʼbate: ¿Kʼu yuʼun cha vat avoʼonton?, x-utat. La jyal ti jaʼ ta skoj ti mu lekuk oy li Jerusalene xchiʼuk ti jinem li smuroaltake. ¿Kʼusi cha kʼan cha pas?, x-utat yuʼun li ajvalile.

Akʼo batkun ta Jerusalén, sventa xba jvaʼan li smuroaltake, xi li Nehemiase. Li Artajerjese toj lek yoʼonton. Jech oxal la jyalbe ti xuʼ xbate, xchiʼuk la skolta ta saʼel teʼ sventa chtun ta spasel jlomuk li abtelale. Mu toʼox sjaliluk skʼotel ta Jerusalén li Nehemiase, la jyalbe jteklum li kʼusi oy ta yoʼonton tspase. Lek la jyaʼiik, jaʼ yuʼun xi la jyalike: Lik jvaʼantik li muroetike, xiik.

Kʼalaluk la jyakʼik venta li yajkontratak Israel ti yantik xmuy batel li smuroaltak Jerusalene, xi la jyalike: Ta xi jmuyutik, ta xba jmiltik xchiʼuk ta jpajesbetik li yabtelike, xiik. Kʼalaluk la jyaʼi Nehemías taje, la jyakʼbe yespada xchiʼuk slansa li j-abteletike xchiʼuk xi la jyalanbee: Mu xa xiʼik. Pasik leto ta sventa li avutsʼ avalalike, li anichʼnabike, li avajnilike xchiʼuk ta sventa li anaike, xi.

Li jteklume toj tsots yoʼonton. Kʼakʼal-akʼobal chapal yabtejebik sventa pas leto, jech noxtok yakalik ta svaʼanel li muroetike. Jaʼ yuʼun, tsuts noʼox yuʼunik ta 52 kʼakʼal. Tana liʼ ne muʼyuk xa xiʼel li ta lume. Li Nehemías xchiʼuk li Esdrase ta xchanubtasik ta smantal Dios li jteklume, jech oxal xmuyubajik.

Pe mi jaʼuk xkoʼolaj ti kʼux-elan oyik kʼalal mu toʼox ta xchukatik batel ta Babiloniae. Yuʼun jaʼ tspas mantal li ajvalil ta Persiae, jech oxal li j-israeletike skʼan xchʼunbeik smantal. Pe li Jeovae yaloj ti tstak tal jun achʼ ajvalile, taje chichʼ talel lekilal ta sventa li jteklume. ¿Buchʼu taje? ¿Kʼuxi ta xichʼ tal lekilal li ta Balumile? Sventa ta jnaʼtik taje ta x-echʼ 450 jabil. Vaʼun oy kʼusi toj tsots skʼoplal chkʼot ta pasel, ta xvokʼ jun neneʼ. Pe li kʼusi chkʼot ta pasel taje yan-o to skʼoplal.