Tantara 83

Lakoron’ny Tanànan’i Jerosalema

ZAHAVA olo aby io miasa. Israelita aby io sahiran̈a man̈amboatra lakoron’ny tanànan’i Jerosalema. Efa 152 taon̈o zay lôso, Ampanjaka Nebokadnezara nandrongana izio, ndreky nan̈ôro varavaran̈a tanàna io. Israelita boaka ta Babylaony aby in̈y tsy nan̈amboatra lakoro io.

Karakôry mba fahitanao olo aby io nipetraka tamy tanàna tsisy lakoro tan̈atin’ny taon̈o taon̈o? Tsy nandry baka jerin-drô, fôtony mora amy fahavalon-drô manafiky irô. Nehemia amy zay iziô hitatahy olo aby io han̈amboatra lakoro io. Mba hainao azôvy Nehemia?

Nehemia io Israelita boaka amy tanànan’i Sosana, tany nipitrahan’i Mordekay ndreky Estera. Nehemia niasa tamy tran̈on’ampanjaka, ke izy nisaora kamaradin’i Mordekay ndreky Ampanjakavavy Estera. Baiboly tsy mivolan̈a fa Nehemia niasa tamin’Ampanjaka Ahasoerosy, vadin’Estera. Izy niasa tamy Artaksersesy, ampanjaka nandimby araiky io.

Tsaraova fa Artaksersesy io ampanjaka tsara fan̈ahy nan̈amia Ezra vola jiaby nan̈amboaran̈a tempolin’i Jehovah in̈y. Ezra fo tsy nan̈amboatra lakoron’ny tanàna io. Alô zahavatsika nahavy Nehemia nan̈ano asa io.

Efa 13 taon̈o zay lôso, Artaksersesy nan̈amia vola Ezra han̈amboaran̈a tempoly in̈y. Nehemia amy zay iziô sefo tamy mpitaondra divain’Ampanjaka Artaksersesy. Dikan’izen̈y, izy mpan̈amia divay ampanjaka io, ke izy nila nizaha tsara, tsao misy olo mamôriky ampanjaka io. Tsy kila olo man̈ano asa zen̈y.

Andra araiky, Hanania rahalahin’i Nehemia ndreky olo sasany boaka tan’Israely, navy hamangy Nehemia. Irô nitantara taminany raha mahazo Israelita aby io. Nambaran-drô izy koa fa mbala tsendriky voamboatra lakoron’ny tanànan’i Jerosalema. Nehemia koa fa naharen̈y zen̈y nalahelo mare, ke izy nivavaka tamy Jehovah.

Andra araiky, ampanjaka in̈y nahita fa Nehemia nalahelo. Izy nan̈ontany: ‘Nan̈ino ma anao karaha malemilemy?’ Nehemia nitantara taminany fa robaka tanànan’i Jerosalema, baka iô lakoro raongana in̈y tsendriky voamboatra. Ampanjaka in̈y amy zay nan̈ontany izy: ‘Ke ino raha ilainao?’

Nehemia nivolan̈a: ‘Zaho mangataka lalan̈a andeha Jerosalema, an̈y zaho mahavita man̈amboatra lakoro io.’ Ampanjaka Artaksersesy farany tsara fan̈ahy eky. Nimboany nandeha Nehemia, baka iô koa izy nan̈ampy Nehemia hahita kakazo an̈amboaran̈a raha sasany. Nehemia amy zay koa fa navy ta Jerosalema, nambarany olo hevitrinany. Tian’olo hevitry zen̈y, ke irô nivolan̈a: ‘Alô atsika hanampôno.’

Fahavolon’Israelita aby io koa fa nahita fa nitsangana lakoro io, irô nivolan̈a: ‘Alô irô vonetsika, beky tsy vita raha ataon-drô io.’ Nehemia naharen̈y mikasiky izin̈y, ke namiany mesobe ndreky saboa mpiasa jiaby. Izy amy zay nivolan̈a: ‘Anarô kaza mavozo fahavalotsika aby io. Miadiva fo. Ataova an̈aty jery rahalahinarô, zanakanarô, vadinarô ndreky tran̈onarô.’

Olo amy zay tsy navozovozo. Raha fiadivan̈a aby in̈y tsy niala tamin-drô, ndray matsan̈a, ndray alin̈y. Irô niasa fo, ke 52 andra fo lakorobe in̈y fa vita. Iziô amy zay vo nilamin̈y sain̈in’olo, mba an̈atin’ny tanàna. Nehemia ndreky Ezra nampianatra lalàn̈an’ny Zan̈ahary, ke olo jiaby ravoravo.

Fiain̈anan-drô tamy zen̈y fo tsy niran̈a talohan’irô gadra ta Babylona in̈y. Mbala ampanjakan’i Persia fo nitaondra irô, ke irô tsy maintsy manompo izy. Jehovah nivolan̈a fa han̈amia irô ampanjaka vaovao, ke olo jiaby hiadan̈a izikoa fa hitaondra ampanjaka io. Azôvy ma ampanjaka io? Karakôry hataony hampiadan̈a olo jiaby? Atsika antsendriky hianatra raha nandalo tan̈atin’ny 450 taon̈o. Nisy tsaiky araiky nalaza amy zay teraka. Mbala tantara hafa koa zen̈y.

Nehemia toko voanalohany ziska toko faha-6.