ALOLE masengo gagakutendekwa apanoga. Ayisalayeli akukamula masengo mnope gakutaŵa lutenje lwa Yelusalemu. Mwenye Nebukadinesala paŵajonangaga Yelusalemu yaka 152 yipiteyo, ŵagumwile lutenje nikucoma yipata ya msinda. Ayisalayeli nganataŵasoni lutenjelu paŵagambile kutyocela ku Babelo.

Ana akuganisya kuti ŵandu ŵapikanaga wuli mumtima mwawo kutama mumsinda wawo wangali lutenje kwa yaka yosopeyi? Aŵele mkulipikana kuŵa ŵangali citeteyo. Acimmagongo ŵawo komboleka kwinjila mwangasawusya kukuputa ngondo. Nambo sambano munduju Nehemiya akwakamucisya ŵandu kutaŵasoni lutenje. Ana akummanyilila Nehemiya?

Nehemiya ali mundu jwaciyisalayeli jwakusatyocela mu msinda wa Susani, kwakusatama Moledekayi ni Esitele. Nehemiya ŵakamulaga masengo m’nyumba ja mwenye, m’yoyo komboleka kuti Moledekayi ni Esitele ŵaliji acimjakwe mnope. Nambo Baibulo ngajikusala kuti Nehemiya ŵamkamulilaga masengo Mwenye Ahasiwelo, ŵamkwakwe Esitele. Jwalakwe ŵamkamulilaga masengo mwenye jwakuyicisya, Mwenye Alitasasita.

Akumbucile kuti Alitasasita ali mwenye jwambone jula juŵampele Esala mbiya syejinji kuti ajawule ku Yelusalemu kuti akalinganye nyumba ja Yehofa. Nambo Esala nganataŵa lutenje lwa msinda lwalwagwile. Kwende tulole mwayaŵelele kuti Nehemiya akamule masengoga.

Yaka 13 yipite Alitasasita cimpele Esala mbiya syakulinganyicisya nyumba ja Mlungu. Nehemiya sambano ali jwamkulungwa jwa ŵakupelecela mgawo kwa Mwenye Alitasasita. Yeleyi yikugopolela kuti akusapelecela finyo kwa mwenye, soni akusalolecesya kuti pangali jwalijose jwakutaga poisoni mu finyo jwa mwenye. Gelega gali masengo gakusosekwa mnope.

Lisiku line Hanani m’balegwe Nehemiya ni ŵandu ŵane ŵa ku cilambo ca Yisalayeli akwika kukuwonegana ni Nehemiya. Akumsalila pakwamba ya yakusawusya yakusimana nayo Ayisalayeli, soni kuti lutenje lwa Yelusalemu luli lwejonasicepe. Yeleyi yikumtendekasya Nehemiya kudandawula mnope, kaneko akujipopelela nganiji kwa Yehofa.

Lisiku line mwenye akuyiwona kuti Nehemiya ali jwacanasa, m’yoyo akum’wusya kuti: ‘Ana ligongo cici mkuwoneka jwakudandawula mnope?’ Nehemiya akumsalila kuti lili ligongo lyakuti Yelusalemu ali mu ndamo jakusakala, soni lutenje lwajonasice. Mwenyejo akum’wusya kuti: ‘Ana mkusaka cici?’

Nehemiya akwanga kuti: ‘Angunde njawule ku Yelusalemu kuti ngataŵe lutenje.’ Mwenye Alitasasita ali jwambone mtima. Akusala kuti Nehemiya komboleka kwawula, soni akumpa yitela yakamulicisya masengo pa kutaŵako. Nehemiya pagambile kopocela ku Yelusalemu, akwasalila ŵandu yakusaka kutenda. Ŵandu akusangalala nayo, soni akuŵeceta kuti: ‘Kwende tutande kutaŵa.’

Acimmagongo ŵa Ayisalayeli pakuluwona lutenje luli mkutaŵigwa, akuŵeceta kuti: ‘Citwajawulile tukawulaje kuti masengo gakutaŵa gakajendelecela.’ Nambo Nehemiya akupikana yeleyi, m’yoyo akwapa ŵandu ŵakukamula masengowo maupanga ni mapanga. Nikwasalila kuti: ‘Akasiŵajogopa acimmagongo ŵetu. Apute ngondo jakwacenjela abale ŵawo, ŵanace ŵawo, aciŵamkwawo, soni nyumba syawo.’

Ŵanduwo ali ŵakulimba mtima mnope. Akujigala yida yawo ya ngondo musi ni cilo, aku ali mkwendelecela ni masengo gakutaŵa. M’yoyo kwa masiku 52 basi, akumalisya kutaŵa lutenje. Sambano ŵandu akulipikana kuŵa ŵaciteteyo mkati mwa msinda. Nehemiya ni Esala akwajiganya ŵandu malamusi ga Mlungu, soni ŵanduwo akusengwa.

Nambo yindu nganiyiŵa mpela muyaŵelele Ayisalayeli mkanajawule ku ukapolo ku Babelo. Ŵanduŵa akulamuligwa ni mwenye jwa ku Pelesiya, soni akusosekwa kumtumicilaga. Nambo Yehofa akupeleka cilangano cakuti cacitumisya mwenye jwasambano, soni kuti mwenye jwasambanojo caciyikasya mtunjelele kwa ŵandu. Ana mwenyeju nduni? Ana caciyikasya mtunjelele pacilambo catuli? Yaka ciŵandika 450 yikumala yeleyi mkaniyimanyice. Kaneko mwanace jwakusosekwa mnope akupagwa. Nambo jeleji jili ngani jine.