María sat suma tawaqumpi parliriw Gabriel sat angelaruxa Diosax khitanïna. Mä waw ususïta, jupasti wiñayatakiw apnaqani sänwa uka angelaxa. Jesús sat uka wawasti, uywa ikiñ utanwa yurïna, ukaruw uwij awatirinakax sarapxäna. Uka qhipatxa, mä warawaraw Inti jalsu tuqit jaqinakar irpanïna. Khitis uka warawara kʼajtayäna ukat Jesusar jan jiwayapxañapatakix kunjamatsa qhispiyapxäna uka tuqinakatwa yatxatañäni.

Ukatxa, 12 maranïxan ukhawa Jesusaxa Diosan utapan yatichirinakampi parläna. Tunka kimsaqallq marampi saraqxäna ukhaw Jesusax bautisasxäna, ukhatpachawa Diosax kuna amtampitï Jesusar khitankäna ukxa phuqäna, Diosan Apnaqäwipwa yatiyäna. Uk yanaptʼayasiñatakixa 12 jaqinakwa ajllïna apostolanakapäpxañapataki.

Jesusax walja milagronakwa lurarakïna. Waranq waranqa jaqinakaruw mä qhawqha chawllampi mä qhawqha tʼantʼampi manqʼayäna. Usutanakaruw qulläna asta jiwatanaksa jaktayarakïnwa. Ukatxa, kunanakas jiwkän uka urunxa Jesusar pasatayna ukanakwa yatxatarakiñäni ukat kunjamsa jiwayapxän uksa ukhamaraki. Jesusax kimsa mara chikataniw yatiyas sarnaqäna, ukhamasti aka SUXTA Jaljäwinxa 34 jila maranakatwa parlasi.