Pe ánhel Gabriel oñemondo peteĩ kuñataĩ ipyʼaporãva rendápe, hérava María. Heʼi chupe imembytaha peteĩ mitãkuimbaʼe haʼétava rréi ha ogovernátava opa ára g̃uarã. María memby héra Jesús, ha onase umi mymba ojeguerekohápe. Upépe ovisita chupe umi pastorkuéra. Upéi, peteĩ estrélla ogia umi kuimbaʼépe oúva Oriéntegui pe mitã oĩhápe. Ñaaprende mávapa ohechauka chupekuéra pe estrélla, ha mbaʼéichapa Jesús ojesalva umi ojukasévagui chupe.

Upéi, jatopa Jesúspe oguerekórõ guare 12 áño oñemongeta jave témplope mboʼeharakuéra ndive. Dieciocho áño ohasa rire, Jesús ojevautisa, ha oñepyrũ opredika ha omboʼe Rréinogui. Upevarã Ñandejára ombouvaʼekue chupe ko Yvy ape ári. Oipytyvõ hag̃ua chupe ko tembiapópe, Jesús oiporavo 12 kuimbaʼe ha ojapo chuguikuéra ijapóstol.

Jesús avei ojapo heta milágro. Omongaru hetaitereípe oiporúvo mbovymi piraʼi ha pán. Omonguera umi hasývape ha omopuʼã avei omanovaʼekuépe. Ipahápe, ñaaprende heta mbaʼe ojehuvaʼekue Jesúspe pe último día omano mboyve, ha mbaʼéichapa ojejuka. Jesús opredikavaʼekue tres áño ha seis mése rupi, upévare PÁRTE 6 omombeʼu umi oikovaʼekue 34 áño rasamíme.