Mũlaĩka Kavilieli nĩwatũmiwe kwa mwĩĩtu mũseo weetawa Meli. Amwĩie kana akasyaa mwana ũla ũkasumbĩka tene na tene. Kana kau, Yesũ, kasyaĩwe kyũũnĩ kya indo, vala aĩthi maendie kũkasisya. Ĩtina, ndata nĩyatongoeisye andũ kuma wumĩlonĩ wa syũa nginya vala kana kau kanini kaĩ. Nĩtũkwĩmanyĩsya nũũ ũla watumie mona ndata ĩsu, na ũndũ Yesũ watangĩĩiwe ndakoawe.

Na twĩsyoka, twone Yesũ, e na ũkũũ wa myaka 12, aineena na alimũ ĩkalũnĩ. Na myaka ĩkũmi na nyanya ĩtina wa ũndũ ũsu, Yesũ nĩwavatisiwe na ĩndĩ ambĩĩa wĩa ũla Ngai wamũtũmĩte oke kwĩka kũũ nthĩ naw’o nĩkũtavany’a na kũmanyĩsya ĩũlũ wa Ũsumbĩ. Yesũ nĩwanyuvie aũme ĩkũmi na elĩ na amatw’a atũmwa make nĩ kana mamũtetheesye wĩa ũsu.

Na ĩngĩ Yesũ nĩweekie syama nyingĩ. Nĩwatũmĩie o makũyũ manini na mĩkate mĩnini kũmanenga lĩu andũ ngili mbingĩ. Nĩwavoisye awau o na athayũũkya akw’ũ. Na ĩtina vyũ tũkeemanyĩsya ĩũlũ wa maũndũ ala mamũkwatie mũthenya wa mũminũkĩlyo wa thayũ wake, na ũndũ wooaiwe. Yesũ atavanisye kwa ĩvinda ya ta myaka ĩtatũ na nyusu, Kwoou KĨLUNGU kya 6 kĩeleetye maũndũ ma ĩvinda ya myaka 34 na kĩndũ.