Li Yos kixtaqla li anjel Gabriel re xyeebʼal re xMaria naq twanq jun li xkʼuulaʼal, li t-awabʼejinq chi junelik. Li kʼuulaʼal aʼan li Jesus. Li Jesus kiyoʼlaak saʼ xnaʼajebʼ li xul ut ebʼ laj kʼaakʼalenel karneer keʼwulak chi rilbʼal. Chirix chik aʼan, jun li chahim kixkʼam wiibʼ oxibʼ chi winq li nekeʼchalk saʼ relebʼl Saqʼe re naq teʼxtaw li Jesus. Joʼkan ajwiʼ tqatzol ani kixbʼaanu naq teʼril li chahim aʼin ut chanru kikoleʼk li Jesus re naq inkʼaʼ teʼxkamsi.

Li Jesus wank 12 chihabʼ re naq kiʼaatinak rikʼinebʼ li nekeʼkʼutuk saʼ li Rochoch li Yos. Naq kinumeʼk 18 chihabʼ, li Jesus kisubʼeʼk saʼ haʼ. Chirix chik aʼan, kiʼok xpuktesinkil li chaabʼil esilal ut kiʼok chi kʼutuk chirix li Xnimajwal Awabʼejilal li Yos, xbʼaan aʼan aj e naq kitaqlaak chaq saʼ Ruuchichʼochʼ. Li Jesus kixsikʼ 12 chi winq choʼq xtzolom, re naq ttenqʼaaq saʼ li kʼanjel aʼin.

Li Jesus kixbʼaanu ajwiʼ li sachbʼachʼoolej. Kixkʼehebʼ chi waʼak ebʼ li tenamit rikʼin wiibʼ oxibʼ chi kar ut kaxlan wa. Kixkʼirtasihebʼ li yaj ut kixwaklesi chi yoʼyo ebʼ li kamenaq. Toj tqatzol kʼaru kixkʼul li Jesus ut chanru keʼxkamsi. Li Jesus kixpuktesi li chaabʼil esilal chiru oxibʼ chihabʼ rikʼin waqibʼ po tana. Chixjunil li XWAQ Tasal aʼin, kikʼulmank tana chiru 34 chihabʼ.