Gɔd sɛn wan enjɛl we nem Gebrɛl to wan fayn uman we nem Meri. I tɛl Meri se, Meri go bɔn wan pikin we go bi kiŋ sote go. Na di pikin in nem Jizɔs. Dɛn bɔn am na wan ples we dɛn de kip animal dɛn. Sɔm shɛpad dɛn go fɛn am de. Leta, wan sta kɛr sɔm man dɛn go usay Jizɔs de. Dɛn man ya kɔmɔt na di Ist. Wi go lan bɔt udat mek dɛn si di sta, ɛn aw Jiova sev Jizɔs we dɛn bin de tray fɔ kil am.

Afta dat, wi go lan bɔt aw Jizɔs bin de tɔk wit di ticha dɛn na di tɛmpul we i ol 12 ia. Jizɔs baptayz we i ol 30 ia. Dɔn i bigin fɔ prich ɛn tich pipul dɛn bɔt Gɔd in kiŋdɔm bikɔs na dis wok ya in papa sɛn am fɔ kam du. Jizɔs pik 12 man dɛn fɔ bi in apɔsul dɛn, so dat dɛn go ɛp am fɔ du dis wok.

Jizɔs du bɔku mirekul dɛn. I tek smɔl bred ɛn smɔl fish fɔ fid bɔku bɔku pipul dɛn. I mɛn di wan dɛn we sik ɛn gi layf bak to di wan dɛn we dɔn day. Wi go lan bɔt plɛnti tin dɛn we apin to Jizɔs di de we i day, ɛn aw dɛn kil am. Jizɔs prich fɔ lɛk tri ɛn af ia so. Ɔltin we apin na PAT 6 tek lɛk 34 ia so.