Naa nda dou chɔluaa nyɛdiaa wa nda velu Chiisu ni. Loŋ nda wa ni mi wanaa mandaa lasaa komal nda. Kɛ tuupa mi Chiisu vialuŋ, Mɛlɛka vem fɛŋ kiilanɔ ndɔɔ diolaŋ aa Kebilɛl o chua kɛndɛ pumndo. Chua koŋ diolaŋ aa Meele. Mbo dimul ndu maa o nɔ le poo violɔɔ o Mɛlɛka kɛsi niŋ masaa lefafɛɛŋndo. O violɔŋ Chiisoo kɔɔli, mi luei chɔm puaa pum nɛiyo le kɔlaŋ naa o veluŋnda. Ba paaleŋ le chaŋndo puaa haa chɛŋ ni. Ŋ cho hunɔɔ pɛɛku a wana tosa mi waŋnda haa cha luei heiyo. Nduyɛ, a mɛɛ Chiisu kinda o ichɛlɛkpɛya yɛ.

Teleŋ Chiisu wa wɔsilaŋ 12 ndo, mbo luɛi o maaŋndo niŋ suukaŋndo a wanaa pɛɛku waŋnda sawala Mɛlɛkalaŋnda. Ŋ cho hunɔɔ pɛɛku a mɛɛ o tosa hei yɛ. Mɛɛ wɔsilaŋ la hiou 18 okoŋ kɔɔli, mbo sɔla yiŋɔɔ. Okoŋ, mbo kandu niko waŋnda dimullo yooŋgu kɛndɔɔ a masale Mɛlɛkaleŋ okɔɔ. Le hei finya ndɔ ndoo yɔŋ ndu o chieeŋndo hoo choo ni. Mi Chiisu hɛli buɛiya 12 le ma mala ndu yooŋgu kɛndɔɔ hoo dimi o waŋnda lo.

Mi Chiisu tosa vɛlɛ kaamaalaŋ tau. Teleŋ waŋnda wa a yiaŋndo, mbo chua beediiyo kpuŋkpaŋ ŋtiŋ, a suva nyɛɛmbɔ. Okoŋ, mbo tosa mi waŋnda waalaŋ o waalaŋ niŋ dia. Mbo siŋgi wanaa wa a naalaŋnda. Mbo miŋgi vɛlɛ waŋvilɛiya yoomu. Nyɛ mɛɛlaa kpɔŋ, ŋ cho hunɔɔ pɛɛku a mɛɛ nda dii Chiisu yɛ, nduyɛ a nyɛm yɔŋnuŋ ndu woŋ tuupa mbo sɔla piɔmndo. Wɔsioŋ ŋgaa a tɛndaa tɛɛŋ Chiisu dimul waŋnda yooŋgu kɛndɛ Mɛlɛkaa ni. Sɔɔŋ yɔŋnuŋ o BUŊGƐI ŋɔmpumnde hei niŋnde ŋ chua le suɛi wɔsila 34.