Muengeli Ngabiliyera kwa mu tumine komukadona gomuwa gedina Mariya. Age kwa tanterere Mariya asi nga kara nomunona ogu nga pangera ngahompa narunye. Munona Jesus kwa mu hampurukilire mohambo, omu va ya mu dingwire vasita. Konyima, mbungururu kwa pitisilire vagara wokoUpumezuva va ze komunona ogu. Tatu ka lironga asi yilye ga va likidire mbungururu, ntani ngapi Jesus omu ga yoworokere kehetekero ko lyokumudipaga.

Kutunda opo, tatu mono Jesus, apa ga kere age nomvhura 12, ta uyunga novarongi montembeli. Konyima zonomvhura 18 Jesus tava mu kuhu, makura ta tameke yirugana yokuzuvhisa Uhompa nokuronga eyi ga mu tuminine Karunga pevhu asi a ya yi rugane. Jesus kwa horowere vagara 12 nokuvaninka vapostoli vendi, yipo va mu vatere moyirugana eyi.

Jesus kwa rugene hena yitetu yoyinzi. Age kwa kutikire mayovi govantu nonomfi dononunu ntani nonomboroto dononsesu tupu. Age kwa verwire vaveli ntani nokupindura vafe. Mouhura, tatu lirongo kuhamena yininke yoyinzi eyi ya horokerere Jesus mezuva lyokuhulilira lyeparu lyendi, ntani nomu va mu dipagere. Jesus kwa zuvhisire poyiha yokusika ponomvhura ntatu noukahe, ano RUHA 6 kwa kwatakana siruwo sokupitakana tupu ponomvhura 34.