Мариям аттуу бир жакшы кызга Жебирейил периште жөнөтүлөт. Ал анын уулдуу болорун жана уулу түбөлүккө падышалык кыларын айтат. Ошол бала, Ыйса, малканада төрөлөт жана койчулар аны көргөнү келет. Кийинчерээк бир жылдыз чыгышта жашаган адамдарга наристеге жеткиче жол көрсөтүп келгени жөнүндө окуйбуз. Ошондой эле аларга жылдызды ким көрсөткөнүн жана өлтүрүүгө жасалган аракеттерге карабастан Ыйсанын кантип аман калганын билебиз.

Андан кийин 12 жаштагы Ыйсаны ийбадатканада окутуучулар менен сүйлөшүп отурган жеринен табабыз. 18 жылдан кийин Ыйса чөмүлтүлүп, Кудай тапшырган ишке, Падышалык тууралуу кабар таратуу жана окутуу ишине киришет. Ал 12 адамды тандап, өзүнө жардам берүү үчүн элчи кылат.

Ыйса көптөгөн кереметтерди да жасайт. Ал бир нече кичине балык жана бир аз гана нан менен миңдеген адамдарды тойгузат. Оорулууларды айыктырат, атүгүл өлгөндөрдү тирилтет. Аягында Ыйсанын жашоосунун акыркы күндөрүндө кандай окуялар болуп өткөнү жана анын кантип өлтүрүлгөнү тууралуу окуйбуз. Ыйса үч жарым жылдай кабар айткан, демек, АЛТЫНЧЫ бөлүк 34 жылдан бир аз көбүрөөк убакытты камтыйт.