Inkalamba Gabiliyeli yalituminwe kuli moye umulombe uwailicilwe ati Maliya. Kaimubula ati akakwato’mwana uukaba ni mfumu iikalukuteka umuyayaya. Umwana, Yesu, alifyalilwe mu cibaya, uko abembesi baisile mu kumubona. Impindi imbi, akabangabanga kalibatangilile abalalume ukufuma ku mutulesuba ukwisa ku mwanice. Tulasambilila uwabalengele ukubona kalya akabangabanga, kabili nefi Yesu apulukile ku kufwaisyo’kumwipaya.

Mukukonkapo, tulasangana Yesu, ili aali ne myaka ya kufyalwa 12, alukulabila ne basambisi mwi tempuli. Panuma yakupita imyaka ikumi na isanu na itatu baYesu balibatisiwilwe, kabili balitatikileko ukutulisya palwa Bufumu ne kusambisya ifi baLesa babatumine ukwisa mukucita pa calo. Kukubofwako muli uyu mulimo, baYesu balisobwele abalalume 12 ne kuba intangisi syabo.

BaYesu kabili balicitile ifimpelampela ifingi. Baalilisisye amasausande abantu isabi ilinini na sinkwa iinini. Baaliposesye abalwasi ne kubusya abafwile. Mukupelako, tulasambilila ifyakuti ubwingi baYesu bacitile mu kasuba kakupelako aka mweo wabo, kabili ne fibabepeye. BaYesu balitulisye apepi koti myaka itatu na afu, popele ICIPUTUSYA 6 cilalabila pa mpindi ukucilako panini pa myaka 34.