Je ánkje Gabriel ya kinikasén nga kinrʼoe jngo chjoónxti xi nʼio nda kisʼin je xi María tsakʼin. Kʼoakitsole nga jngo ʼndí sʼele xi rey koa̱n xi kʼoasʼin koatexoma ngantsjai. Je ʼndí jebi, je Jesús, ya kitsin jña satioʼya cho̱, jñani kichonrʼoe je chjota xi koʼnda cho̱. Xijekoanni, jngo niño tsakándiale je chjota xi ya jaʼaini ya jña tjoni tsʼuí xi ya saʼnda kichokao jña tíjna Jesús. Kʼoati jchaa ʼyáni xi kisikʼatsenle niño xokji, kʼoa jósʼin kitjontjai Jesús ninga nʼio tsakásjaile je chjota nga mele sikʼien.

Xijekoa̱n, kʼoati jchaa nga je tejao nóle Jesús, nga tsakjákao je xi bakóya kjoatéxoma ya yo̱ngo̱. Xijekoanni xjaʼaonjan nó kʼia kiskanisʼenngindá yaole Jesús, kʼoa kʼia tsakʼétsʼiakao nga tsakakóyason josʼin koatexoma Niná i̱ Sonʼnde, nga kui xá kisikasénni Niná. Kʼoati tejao chjota kiskoejin Jesús xi kʼoasʼin tsakasenkao xi tʼatsʼe xá jebi kʼoa pastrole kisikao.

Kʼoati nʼio nkjín choa̱ tsakatío Jesús. Nkjín jmi chjota kisikjen ninga tojao jan jti̱ xi ʼndí kjoan tjíole kao nioxtila. Kisindaya je xi tjíomʼe. Kʼoa saʼnda kisikjaʼáyale je kʼien. Xi fetʼani, kʼoati jchasa ngayeje jmeni xi koantʼain Jesús nichxin nga kinikʼien, kʼoa jókinikao nga kinikʼien. Jan nó basen tsakakóya Jesús, je XI MAJAONNI jebi kʼoa tsʼato kanteño nó tínchjani.