Ne fakafano e agelu ko Kaperielu ke he fifine fuata mitaki ko Maria. Tala age e agelu ki a ia to fai tama a ia, ko ia ka pule tukulagi ko e patuiki. Ko e tama ko Iesu, ne fanau he fale povi, matakavi ne ahiahi atu e tau leveki mamoe ki a ia. Fai magaaho, ti takitaki he fetu e tau tagata taane mai he Faahi Uta ke he tama tote. To fakaako a tautolu ko hai ne omoomoi a lautolu ke kitia e fetu, mo e puhala ne fakahao a Iesu mai he tau laliaga ke tamate a ia.

Holo atu ai, to kitia e tautolu a Iesu he mogo ne 12 e tau haana, kua tutala ke he tau akoako i loto he faituga. Hogofulu ma valu e tau he mole ti papatiso a Iesu, ne kamata a ia ke fakamatala e Kautu mo e gahua fakaako ne fakafano mai he Atua a ia ke he lalolagi ke taute. Ke lagomatai a ia he gahua nei, ne fifili e Iesu toko 12 e tagata taane ti eke a lautolu mo tau aposetolo haana.

Ne loga foki e mana ne taute e Iesu. Fagai e ia e tau afe tagata ke he gahoa e ika ikiiki mo e gahoa e falaoa. Ne fakamaulu e ia a lautolu ne gagao mo e fakaliu tu mai foki e tau tagata ne mamate. Fakahiku ai, to fakaako a tautolu ke he tau mena loga ne tupu ki a Iesu he tau aho fakamui he moui haana, mo e puhala ne mate ai a ia. Ne fakamatala a Iesu, kavi ke he tolu mo e hafa e tau, ti ko e VALA 6 kua putoia e magaaho ne molea fakatote e 34 e tau tau.