Bɛzoanle anwumabɔvolɛ Geebeleɛle wɔ bɛlɛra kɛnlɛma bie mɔɔ bɛfɛlɛ ye Mɛle la ɛkɛ. Ɔhanle ɔhilele ye kɛ ɔbanrenzɛ yeawo ralɛ nrenya mɔɔ bali belemgbunli dahuu a. Bɛwole adɔma Gyisɛse wɔ mboane tunli nu, na mboaneneavolɛma hɔle ɛkɛ hɔkpɔlale ye. Nzinlii, ɛwɔlɔra bie hilele menli bie mɔɔ vi Aduduleɛ la adenle hɔle adɔma ne anwo ɛkɛ. Yɛnwu ahenle mɔɔ manle bɛnwunle zɔhane ɛwɔlɔra ne nee kɛzi bɛliele Gyisɛse bɛvile mɔdenle biala mɔɔ menli bɔle kɛ bɛku ye la anu la.

Bieko, yɛnwu Gyisɛse, mekɛ mɔɔ ɛnee yeli ɛvolɛ 12 la kɛ, ɔ nee ɛzonlenlɛ sua ne anu kilehilevolɛma ɛlɛtendɛ. Ye ɛvolɛ bulu nee mɔtwɛ anzi bɛzɔnenle Gyisɛse, na akee ɔbɔle Belemgbunlililɛ nolobɔlɛ nee ngilehilelɛ gyima ne mɔɔ Nyamenle zoanle ye wɔ azɛlɛ ye azo kɛ ɔrayɛ la abo. Amaa yeahola gyima ɛhye yɛ la, Gyisɛse kpale menli 12 na ɔyɛle bɛ ye ɛzoanvolɛma.

Gyisɛse eza yɛle nwanwane ninyɛne dɔɔnwo. Ɔvale fɛlɛ ekyi bie nee kpanwo ekyi bie ɔmanle menli apenle apenle lile bɛ ko yile. Ɔyɛle wuleravolɛma ayile na ɔdwazole mɔwuamra bɔbɔ. Awieleɛ kolaa, yɛnwu mɔɔ dole Gyisɛse wɔ ye ngoane mekɛ mɔɔ li awieleɛ la anu amuala nee kɛzi bɛhunle ye la. Gyisɛse vale ɛvolɛ kɛyɛ nsa nee foa a hanle edwɛkɛ ne a, ɛhye ati Foa NSIA ne bo mekɛ mɔɔ ye tendenle le ɛvolɛ 34 la ekyii.