Äjuä bi me̱hni näꞌä e̱nxe̱ Gabriel pa bä nuu nꞌa hogä nxutsi mi rä thuhu Märia. Näꞌä e̱nxe̱ bi xipi Märia ge ma xä me̱ꞌtsi nꞌa rä tꞌu̱ näꞌä ma xä zo̱ho̱ xä mända pa nzäntho. Näꞌä zi bätsi bi tꞌembi Hesu, bi mꞌu̱i ha nꞌa establo, ꞌne rꞌa yä mayꞌo bi ma bä nuu näꞌä ꞌue̱ne. Mꞌe̱fa, nꞌa tso̱o̱ bi zitsꞌi rꞌa yä ñꞌo̱ho̱ xpi ꞌñehe de Mbo̱xhyadi pa habu̱ mi ꞌmu̱i rä Hesu. Ma gä pädihu̱ toꞌo bi japi bi nheki näꞌä tso̱o̱, ꞌne hanja bi bongi rä Hesu mäske mi ne dä tho.

ꞌNehe ma gä pädihu̱ ge nuꞌmu̱ rä Hesu mi pe̱ꞌtsi 12 yä je̱ya, bi ñäui nuꞌu̱ yä xahnäte ha rä templo. Mi thogi 18 yä je̱ya, rä Hesu bi nku̱ꞌmdehe, geꞌmu̱ bi mu̱di bi ꞌñudi ꞌne bi ungä ntꞌo̱de de rä Tsꞌu̱tꞌhui Äjuä, pa geꞌä bä pe̱hni Äjuä ha rä Xiꞌmhai. Rä Hesu bi hyoni toꞌo bi matsꞌi hänge bi huahni 12 yä ñꞌo̱ho̱ pa bi yꞌo̱tꞌe yä apostol.

Rä Hesu ꞌnehe bi ja ndunthi yä milagro. Bi ꞌuini yä mꞌotho yä jäꞌi ko nꞌa hängutho yä peskado ꞌne yä thuhme. Bi yꞌo̱the nuꞌu̱ mi hñeni ꞌne asta bi gu̱tsꞌi nuꞌu̱ xki du. Pa ri uadi, ꞌnehe ma gä pädihu̱ te bi thogi rä Hesu näꞌä gäxä pa bi mꞌu̱kua ha rä Xiꞌmhai, ꞌne hanja bi tho. Rä Hesu bi ungä ntꞌo̱de de rä Noya Äjuä po hñu nje̱ya mädee. Gatꞌho nuꞌu̱ yä thogi mää ha nunä RÄ NTHEKE 6, bi zitsꞌi ngu 34 yä je̱ya.