Dios a manda angel Gabriel serka un mucha muhé ekselente yamá Maria. El a bisa Maria ku lo e haña un yu ku lo reina komo rei pa semper. E yu, Hesus, a nase den stal, unda wardadónan di karné a bishit’é. Despues, un strea a guia algun hòmber di Oriente serka e mucha. Nos lo siña ta ken a hasi nan mira e strea, i kon Hesus a skapa for di e esfuerso pa mat’é.

Despues di esei nos ta haña Hesus na e edat di 12 aña ta papia ku maestronan den e tèmpel. Diesocho aña despues Hesus a batisá, anto el a kuminsá prediká i siña tokante e Reino, e trabou ku Dios a mand’é na mundu pa hasi. Pa yud’é ku e trabou, Hesus a skohe 12 hòmber i a hasi nan su apòstelnan.

Hesus a hasi hopi milager tambe. El a alimentá míles di hende ku djis un par di piská chikitu i un par di pan. El a kura hende enfermo i asta a lanta morto. Finalmente nos lo siña di e kantidat di kosnan ku Hesus a pasa aden durante e último dia di su bida, i kon nan a mat’é. Hesus a prediká pa rònt di tres aña i mei. Pues, PARTI 6 ta kubri un periodo di poko mas ku 34 aña.