Ri ángel Gabriel xtaq bʼi rukʼ jun utzalaj ali ubʼiʼ María. Xubʼij che ri María che kkʼejeʼ na jun ral che kubʼan ajawinel che kʼot ukʼisik. Ri ral ubʼiʼ Jesús xkʼejeʼ pa jun rachoch chiköp, chilaʼ xekila wi ri täq ajyuqʼ. Tekʼuriʼ jun chʼumil xukʼut ri bʼe che kiwäch nikʼaj achijabʼ, rech keʼopan rukʼ ri Jesús. Kqetaʼmaj na jachin laʼ xubʼano che xekunik xkil ri chʼumil, xuqujeʼ su xbʼan che ukʼolik ri Jesús pa kiqʼabʼ ri winaq kkaj xkekamsaj.

Tekʼuriʼ, kqil na chiʼ Jesús kʼo 12 ujunabʼ, chiʼ kchʼaw rukʼ täq ajkʼamal bʼe e kʼo pa ri loqʼalaj ja. Qʼaxnäq chi 18 junabʼ ri Jesús xubʼan uqasanjaʼ, tekʼuriʼ xumaj utzijoxik utzij ri Ajawaxel chirij ri Ajawbʼäl, rumal che xutaq lo ri Jesús cho ruwäch Ulew. Rech ktoʼ che wajun chak ri Jesús xuchaʼ 12 achijabʼ tekʼuriʼ xubʼan apóstoles chike.

Jesús xuqujeʼ xubʼan kʼi täq milagros. Xuya kiwa sibʼalaj kʼi täq winaq rukʼ jujun täq kar xuqujeʼ rukʼ jujun täq kaxlanwa. Xeʼukunaj ri winaq kʼo yabʼil chike xuqujeʼ xuya chi na kikʼaslemal ri e kamnäq. Kʼisbʼal re, kqetaʼmaj chirij ri kʼi täq jastaq xukʼulmaj ri Jesús pa ri kʼisbʼal qʼij che ri ukʼaslemal, xuqujeʼ su ubʼanik ri ukamikal. Ri Jesús xuya ubʼixik ri utzij ri Ajawaxel pa oxibʼ junabʼ rukʼ nikʼaj, rumal laʼ ri UWAQ Jupuq täq bʼantajik kubʼanaʼ más che 34 junabʼ.