Kua tonoia te angera ko Gaberiela ki tetai mapu vaine meitaki ko Maria te ingoa. Kua akakite aia kiaia e ka anau aia i tetai tamaiti te ka tutara ei ariki e tuatau ua atu. Kua anauia te tamaiti ko Iesu ki roto i te are o te manu te ngai i aravei atu ei te au tiaki mamoe iaia. Muri mai, kua arataki tetai etu i tetai au tangata mei te Itinga ki te tamaiti meangiti. Kua apii tatou e naai i maani ia ratou kia kite i te etu, e i akapeea a Iesu i te akaoraia anga mei te au tauta anga kia tamateia aia.

Aru mai, kua kite mai tatou ia Iesu, e 12 ona mataiti e tuatua ra ki te au puapii i roto i te iero. E tai ngauru ma varu mataiti i muri mai kua papetitoia a Iesu, e kua akamata aia i reira i tana angaanga tutu anga i te Patireia e te apii anga ta te Atua i tono mai iaia ki te enua nei kia rave. Ei tauturu iaia i te rave i teia angaanga, kua iki a Iesu e 12 tangata e kua akariro ia ratou ei au apotetoro nana.

Kua rave katoa a Iesu i te au temeio e manganui. Kua angai aia e tauatini ua atu tangata ki te nga mea ika rikiriki ua e tetai nga mea potonga varaoa. Kua akaora aia i te maki e kua akatu akaou i tei mate. Te openga, kua apii mai tatou no runga i te au apinga e manganui tei tupu kia Iesu i te ra openga o tona oraanga, e i akapeea aia i te tamateia anga. Kua tutu aere a Iesu mei te toru e te apa mataiti, no reira kua pou tetai tuatau e 34 mataiti e tere atu i te TUANGA 6.