දෙවි, මරියා කියන යහපත් තරුණ ස්ත්‍රියක් ළඟට ගාබ්‍රියෙල් කියන දේවදූතයාව යැව්වා. එයා ඇයට කිව්වා සදහටම රජෙක් හැටියට පාලනය කරන්න යන දරුවෙක් ඇයට ලැබෙන්න යනවා කියලා. ඒ දරුවා, ඒ කියන්නේ යේසුස්, ගව මඩුවක ඉපදුණාම ඔහුව බලන්න එඬේරුන් ආවා. ඊට පස්සේ, නැඟෙනහිර දිශාවේ හිටිය මිනිස්සුන්ට මේ පොඩි දරුවා ළඟට එන්න තාරකාවක් මඟ පෙන්නුවා. ඒගොල්ලන්ට මේ තාරකාව පේන්න සැලැස්සුවේ කවුද කියලාත්, යේසුස්ව මරන්න ගත්ත උත්සාහවලින් ඔහු බේරුණේ කොහොමද කියලාත් අපි ඉගෙනගන්න යනවා.

ඊළඟට, යේසුස් අවුරුදු 12දී, දේවමාළිගාවේ ගුරුවරුන් එක්ක කතා කර කර ඉන්නවා දැකගන්න ලැබෙනවා. ඊට අවුරුදු 18කට පස්සේ යේසුස් බව්තීස්ම වුණා. එතකොට ඔහු දෙවි භාර දීලා තිබුණු රාජ්‍යය ගැන දේශනා කිරීමේ සහ ඉගැන්වීමේ වැඩය පටන්ගත්තා. මේ වැඩේට ඔහුට උදව් කරන්න යේසුස් මිනිස්සුන් 12දෙනෙක්ව තෝරාගෙන ඒගොල්ලන්ව ඔහුගේ ප්‍රේරිතයන් කියලා නම් කළා.

යේසුස් පුදුම දේවල් ගොඩක් කළා. මිනිස්සු දහස් ගණනකට ඔහු කන්න දුන්නේ පොඩි මාළු කූරීන් ටිකදෙනෙකුයි පාන් ගෙඩි ටිකකුයි යොදාගෙනයි. ඔහු ලෙඩුන්ව සුව කළා. මැරුණ අයව පවා නැඟිට්ටෙව්වා. මේ කොටසේ අවසානයේදී, යේසුස්ගේ ජීවිතයේ අන්තිම දවසේදී ඔහුට සිදු වුණ දේවල් ගැනත් ඔහුව මැරුවේ කොහොමද කියලාත් අපි ඉගෙනගන්න යනවා. යේසුස් අවුරුදු තුනහමාරක් විතර දේශනා කළා. ඉතින් හයවෙනි කොටසේ අවුරුදු 34කට වඩා ටිකක් වැඩි කාලයක් ගැන කතා කරනවා.