Ángel Gabriel nixuʼmaa ma̱ʼga̱ gáʼyoo mbáa dxáʼgú májánʼ wéñuʼ bi̱ nagumbiʼyuu María. Ikhaa niʼthúu̱n María rí magiʼdaa mbáa ada̱ bi̱ maʼtáñajunʼ kámuu mbiʼi. Ada̱ Jesús nigumaa náa mbá guʼwá náa kúwi̱i̱n xujkhúʼ náa nigún gúyáá tikhun báxtúu. Nda̱wa̱á mbáa a̱ʼgua̱a̱nʼ ni̱jkha̱ kagu̱u̱n tikhun xa̱bekha bi̱ kuwa xígií náa nagájnuu a̱jkha̱ʼ mu magun asndu náa xtáa Jesús. Najmañulúʼ tsáa niʼni rí mbuyáá a̱ʼgua̱a̱n, ga̱jma̱a̱ xú káʼnii nikríyaʼ Jesús náa xa̱bu̱ bi̱ nini mbá tsiakii muxiyáa.

Nda̱wa̱á nuxkamaa Jesús, índo̱ gíʼdoo 12 tsiguʼ, nákha ikhaa xtáa raʼtamijna gajmíi̱n xa̱bu̱ bi̱ nusngáa náa templo. Gu̱wa̱ʼ migiñuʼ tsiguʼ nda̱wa̱á Jesús nijngúun iyáaʼ ga̱jma̱a̱ ikhú nagíʼdu̱u̱ naʼtaraʼa ma̱ngaa naʼsngáa ga̱jma̱a̱ numuu reino, ikhaa numuu rúʼko̱ rí Dios nikuʼmaa náa tsu̱du̱u̱ Ku̱ba̱ʼ. Mu mumbayíí maʼni ñajunʼ rígi̱, Jesús niraʼwíín mbá 12 xa̱bekha ga̱jma̱a̱ niʼnii apóstoles ndrígóo.

Jesús ma̱ngaa niʼni mbaʼa milagro. Nixniʼtsun mbaʼin, ra̱ʼkhá tháán mbaʼin xa̱bu̱ ga̱jma̱a̱ i̱ndó nguáti̱i̱n egi̱ʼ ga̱jma̱a̱ nguéjma̱ pan. Niʼni thanún xa̱bu̱ bi̱ niʼniún nandii ga̱jma̱a̱ asndu nikuxi̱i̱n xa̱bu̱ bi̱ nikháñun. Nda̱wa̱á kayuʼ, najmañulúʼ ga̱jma̱a̱ numuu mbaʼa rí nigíʼnuu Jesús índo̱ itháan makhañúu, ga̱jma̱a̱ xú káʼnii nixiyáa. Jesús niʼtaraʼa ajtsú tsiguʼ tikhu, rí ninújngoo náa NÍʼKHÓO 6 naʼni itháan rí mbá 34 tsiguʼ.