Moengele Gabariele o ne a romelwa kwa lekgarejaneng lengwe le lentle le le bidiwang Marea. O ne a mmolelela gore o tla nna le ngwana yo o tla busang e le kgosi ka bosakhutleng. Ngwana yono e bong Jesu, o ne a tsholelwa mo bonnong jwa dipitse kwa badisa ba ileng ba mo etela gone. Moragonyana, naledi e ne ya kaela banna bangwe ba kwa Botlhaba kwa ngwana a leng teng. Re ithuta gore ke mang yo o dirileng gore ba bone naledi eo, le kafa Jesu a ileng a falola ka gone mo bathong ba ba neng ba batla go mmolaya.

Go tswa foo, Jesu o setse a na le dingwaga di le 12, mme o bua le barutisi mo tempeleng. Dingwaga di le lesome le borobedi moragonyana Jesu o ne a kolobediwa, mme a simolola tiro ya go rera le go ruta ka Bogosi, e Modimo a neng a mo rometse mo lefatsheng go tla go e dira. Jesu o ne a tlhopha banna ba le 12 go mo thusa go dira tiro eno mme a ba dira baaposetoloi ba gagwe.

Gape Jesu o ne a dira dikgakgamatso di le dintsi. O ne a fepa batho ba le diketekete ka ditlhapi le dinkgwe di le mmalwa fela. O ne a fodisa batho ba ba lwalang a bo a tsosa le ba ba suleng. Go tswa foo, re tla ithuta ka dilo di le dintsi tse di diragaletseng Jesu mo letsatsing la bofelo la botshelo jwa gagwe, le ka tsela e a ileng a bolawa ka yone. Jesu o ne a rera dingwaga di ka nna tharo le halofo, ka jalo KAROLO 6 e akaretsa lobaka lo lo batlileng lo feta dingwaga di le 34.