Na‘e fekau‘i ‘a e ‘āngelo ko Kepaleli ki ha finemui lelei ko hono hingoá ko Mele. Na‘á ne tala ange ki ai te ne ma‘u ha tama ‘a ia ‘e pule ko ha tu‘i ‘o ta‘engata. Ko e tamá, ko Sīsū, na‘e fā‘ele‘i ia ‘i ha fale ki he fanga manu, ‘a ia na‘e ‘a‘ahi ki ai ‘a e kau tauhi-sipí. Ki mui mai, na‘e tataki ‘e ha fo‘i fetu‘u ha kau tangata mei he Hahaké ki he ki‘i tamá ni. Te tau ako ‘o ‘ilo ‘a e tokotaha na‘á ne ‘ai kinautolu ke nau sio ki he fetu‘u ko iá, pea mo e founga na‘e fakahaofi ai ‘a Sīsū mei he ngaahi feinga ke tāmate‘i iá.

Ko hono hokó, ‘oku tau ‘ilo ‘a Sīsū, ‘i he‘ene ta‘u 12, na‘á ne talanoa mo e kau faiako ‘i he temipalé. ‘I he ta‘u ‘e taha valu ki mui mai ai na‘e papitaiso ai ‘a Sīsū, peá ne kamata ‘a e ngāue fakamalanga mo e fakafaiako ‘o kau ki he Pule‘angá ‘a ia na‘e fekau mai ai ia ‘e he ‘Otuá ki māmani ke ne fai. Na‘e fili ‘e Sīsū ha kau tangata ‘e toko 12 ‘o ‘ai kinautolu ko ‘ene kau ‘apositolo, ke tokoni kiate ia ‘i he ngāue ko ‘ení.

Na‘e fai foki ‘e Sīsū ha ngaahi mana lahi. Na‘á ne fafanga‘aki ‘a e kakai ‘e laui afe ha fanga ki‘i ika mo ha ngaahi fo‘i mā. Na‘á ne fakamo‘ui ‘a e mahaki pea a‘u ‘o ne fokotu‘u ‘a e kau mate. Ko hono faka‘osí, te tau ako ‘o kau ki he ngaahi me‘a lahi na‘e hoko kia Sīsū he lolotonga ‘a e ‘aho faka‘osi ‘o ‘ene mo‘uí, pea mo e anga ‘o hono tāmate‘í. ‘Oku fakafuofua ko e ngāue fakamalanga ‘a Sīsuú na‘e fe‘unga mo e ta‘u ‘e tolu mo e konga, ko ia ‘oku lave ‘a e KONGA 6 ki ha vaha‘a taimi ‘oku lahi si‘i hake ‘i he ta‘u ‘e 34.