Mungelo Gabuliyele wakatumwa kumusimbi mubotu moyo wazina lya Maliya. Wakamwaambila kuti uya kutumbuka mwana uuya kulela kali mwami kukabe akutamani. Mwana Jesu wakazyalilwa muluba lwaŋombe ooko beembezi nkobakaunka kumubona. Kumane nyenyezi yakasololela bantu kuzwa Kujwe kuya kumwana. Tulaiya wakapa kuti babone nyenyezi eeyo, alimwi Jesu mbwaakafwutulwa kuli yooyo wakali kuyanda kumujaya.

Cabili, tulabona Jesu naakajisi myaka iili 12 kaambaula abafwundisi mutempele. Kwiinde myaka iili 18 Jesu wakabbapatizyigwa, kumane wakatalika kukambauka makani aabwami alimwi amulimo wakuyiisya zyeezyo Leza nzyaakamutumina anyika kuti acite. Kutegwa Jesu agwasyigwe mumulimo ooyu, wakasala bantu bali 12 akuba baapositolo bakwe.

Alimwi Jesu wakacita maleele manji. Wakasanina maunda-maunda aabantu kwiinda mukubelesya nswi azinkwa zisyoonto buyo. Wakaponya baciswa alimwi wakabusya bafwide. Camamanino, tulaiya zintu zinji zyakacitikila Jesu mumazuba aakumamanino aamubuumi bwakwe alimwi ambwaakajaigwa. Jesu wakakambauka kwamyaka iili yotatwe acisela, aboobo CIBEELA 6 caamba ciindi camyaka iinda buyo asyoonto ku 34.