Ángel wanikan Gabriel malakgachaka nalakgan chatum lu xakgstitum tsumat xtukuwani María. Gabriel wanilh pi nakgalhiy aktsu skgata chu mapakgsina nawan chu nikxni katisputli xtamapakgsin. Xkgawasa María, Jesús lakachilh anta niku xkatamaknukan animales anta lakgapaxialhnankgolh tiku xkuentajtlawamakgolh borregos. Akxni tama kilhtamaku akgtum staku kapulalilh lakchixkuwin nema xminkgonitancha niku taxtuyacha Chichini chu kalilh anta niku xwi Jesús. Na nakatsiyaw tiku kamaʼakxilhnilh tama staku, chu la lakgtaxtulh Jesús xlakata lu xmakgniputunkan.

Chu na naʼakxilhaw akxni Jesús xʼakgkutiy kata xkgalhi, xkatachuwinama makgalhtawakgenanin anta ktemplo. Titaxtulh akgkutsayan kata akxni Jesús tamunulh, akxni tama kilhtamaku tsukulh lichuwinantapuli chu xmasiyama xlakata xTamapakgsin Dios wantuku xlimakaminkanit kKatiyatni. Jesús laksakli kgalkutiy lakchixkuwin chu xʼapóstoles katlawalh xlakata tlan xmakgtayakgolh nalichuwinankgoy xlakata xTamapakgsin Dios.

Jesús na tlawalh lhuwa tuku nila tamakanajla. Kaj ni tanlhuwa skiti chu ni maklhuwa kaxtalanchu kalimawilh akglhuwa mil kristianos. Kamapaksalh tatatlanin chu kamalakastakwanilh tiku xnikgonitta. Chu xaʼawatiya tuku lalh, nakatsiyaw katuwa tuku ti akgspulalh Jesús akxni xaʼawatiya kilhtamaku latamalh, chu na nakatsiyaw la makgnikgolh. Akgtutu kata a itat Jesús lichuwinantapulilh xlakata xTamapakgsin Dios. Wantuku litachuwinan KXAPULAKCHAXAN lititaxtulh 34 kata.