Maraika Gabiryeri akatumwa hali omwisiki omurungi kandi omuto ayayetwaga Malyamu. Akamugambira nkoku akaba naija kutunga omwana owakaba naija kulema nk’omukama ebiro byona. Omwana ogu Yesu, akazaalirwa mukiiraro ky’ente, ei abaliisa b’entaama bamubungiire. Hanyumaho, enyunyuzi ekebembera abasaija kuruga Buruga-izooba kubahikya hali omwana omuto. Nitwega hali ogu eyabasobozeseze kurora enyunyuzi, kandi nkoku Yesu yakiziibwe kuruga hali abo abaali nibenda kumwita.

Ekindi, nitusanga Yesu obu akaba aine emyaka 12 y’obukuru, nabaza nabegesa omu yekaru. Emyaka ikumi na munaana obu yahingwireho, Yesu akabatizibwa yatandika kukora omulimu Ruhanga ogu yamutumire kukora mu nsi; nigwo ogw’okutebeza n’okwegesa ha Bukama bwe. Yesu akakoma abasaija 12 kumukonyera mu mulimo gunu, kandi yabafoora abakwenda be.

Yesu akakora n’ebyamahano bingi. Akaliisa enkumi z’abantu n’obucu butaito n’emigaati mitaito. Akakiza abarwaire kandi yahumbura abafu. Mu kumalirra, nitwega ha bintu bingi ebyahikire hali Yesu ha kiro ekyasembereyo mu bwomezi bwe, n’oku yaisirwe. Yesu akatebeza kumara nk’emyaka esatu n’ekicweka, kale EKICWEKA 6 nikitwara obusumi obukuhingura mu myaka 34.