Ginsugo hi anghel Gabriel nga kumadto ha buotan nga daraga nga hi Maria. Ginsumatan hiya nga mag-aanak hiya hin lalaki nga magigin hadi ha kadayonan. Ito nga iya anak nga hi Jesus, natawo ha kwadra, diin ginbisita han mga magbarantay han karnero. Katapos, may-ada kalalakin-an nga tikang ha Sinirangan nga gin-giyahan han bitoon ngadto ha bata. Hibabaroan naton kon hin-o an nagpahinabo nga makita nira an bitoon, ngan kon paonan-o naluwas hi Jesus tikang ha mga karuyag magpatay ha iya.

Sunod, makikita naton hi Jesus han 12 anyos hiya nga nakikiistorya ha mga magturutdo ha templo. Paglabay hin disiotso ka tuig, ginbawtismohan hiya, ngan gintikangan niya an pagsangyaw ngan panutdo mahitungod han Ginhadian nga iginsugo ha iya han Dios nga buhaton dinhi ha tuna. Basi buligan hiya hini nga buruhaton, nagpili hiya hin 12 nga lalaki sugad nga iya mga apostol.

Nagbuhat liwat hi Jesus hin damu nga milagro. Ginpakaon niya an yinukot nga katawohan pinaagi la hin pipira nga isda ngan tinapay. Gintambal niya an magsakit ngan ginbanhaw pa ngani an mga patay. Katapos, hibabaroan liwat naton an mga nahitabo kan Jesus ha adlaw antes hiya patayon, ngan kon paonan-o hiya ginpatay. Nagsangyaw hi Jesus hin mga tulo ngan tunga ka tuig, salit an BAHIN 6 nahitabo ha sulod hin sobra 34 ka tuig.