Fizaran̈a 6

Rango Jesosy Teraka Zisk’izy Naty

Zan̈ahary nan̈iraka anjely Gabriela hamangy man̈angy araiky tsara fan̈ahy. Maria an̈arany. Izy nivolan̈a tamy man̈angy io fa hahazo zaza izy, ke tsaiky io hanjary ampanjaka mandrakizay. Jesosy tsaiky io. Jesosy teraka tan̈aty varion’aomby. Nisy mpiambin̈y ôndrikôndriky namangy izy tao. Koa fa nandeha andra, nisy lakintan̈a nitariky telo lahy boaka Tantin̈ana, handeha amy tany misy tsaiky io. Atsika mbala hianatra azôvy nampahita irô lakintan̈a io, ndreky raha natao beky Jesosy tsy naty.

Atsika hahita koa fa tamy Jesosy 12 taon̈o, nikoran̈a tamy mpampianatra aby tamy tempoly tao. Valo ambin’ny folo taon̈o tafaran’izen̈y, Jesosy natao batisa. Izy nanampôno nan̈ambara tamin’olo raha jiaby mikasiky Fanjakan̈an’ny Zan̈ahary, ndreky raha nan̈irahan’ny Zan̈ahary izy tambony tany. Jesosy nifidy 12 lahy han̈ampy izy tamin’asa io. Apostoly ikahian̈a irô io.

Jesosy nan̈ano fahagagan̈a maro be. Laoko madiniky ndreky môfo hely fo nataony nampavoky olo arivo aby. Izy nampahivan̈a olo marary, nata olo fa maty mbala vitany fo namelon̈o irô. Farany, atsika hianatra raha maro nahazo Jesosy talohan’izy naty, ndreky faomba namonian̈a izy. Tan̈atin’ny telo taon̈o sy sasany, Jesosy nitory fo. Fizaran̈a FAHATSIAOTA ty mikoran̈a raha niboaka 34 taon̈o mandilatra hely.