Ángel ni laa Gabriel goyee ronoʼ toib mbioxhlas tzaay ni laa María. Láabu gochbu María que sioʼ toib xiimbu ni gony mandary por tipzó. Jesús golbu lainy xcorraa nimal, ro tipnés ni rap xiil goyee goyguen láabu. Láaca toib vitzón gosanir nisló tipnés buñguieeu ni bieed niis ro ralainy Govitz par bidxin ronoʼbu. Guisuidyno chú láabu buny par labúu nabiʼyibu vitzón cú, né ximod bilaa Jesús ladxña guirá ni ná nagaity láabu.

Láaca guisuidyno órni Jesús ma nap doce íz, ro cayooybu diitz né tipnés mextra lainy yoʼ xiroʼ ro rac adorar Jehová. Dieciocho íz de goló góc ndeʼ Jesús goyonis, né gosaló gosaabu yoʼ por yoʼ né bisuidybu de Gobierno, par gonybu guirá ni Dios bixel láabu gonybu ló Gudxlio. Par ñoʼ ni ñacné láabu ló dxiinreʼ, golúbu doce buñ par gac xpiimbu.

Jesús láaca bunybu xidal galrradziguiaʼ. Nosi chop tzón beel né chop tzón páa biquiimbu par biyaʼanbu xidalguixo buñ. Bisialbu buñguitz né láaca golísbu gueʼet. Órni mápa mer guidopy Midid reʼ guisuidyno xidal cós ni gosaclobu dzú ni ma yaaca gaitybu, né láaca ximod bigaity buñ láabu. Jesús gosaabu yoʼ por yoʼ por tzón íz gorol, por ngú Midid XHOOP rasaʼni más de 34 íz.