Ingelosi uGabriyeli yathunywa kowesifazane omuhle osemncane ogama lakhe lalinguMariya. Yamtshela ukuthi wayezoba nomntwana owayezobusa njengenkosi kuze kube phakade. Lo mntwana, uJesu, wazalelwa esitebeleni, lapho avakashelwa khona ngabelusi. Kamuva, inkanyezi yaqondisa amadoda ayevela eMpumalanga eya kumntwana omncane. Siyafunda ukuthi ubani owawabangela ukuba abone leyo nkanyezi, nokuthi uJesu wasindiswa kanjani emizamweni yokumbulala.

Ngokulandelayo, sithola uJesu eseneminyaka eyi-12 ubudala, ekhuluma nabefundisi ethempelini. Eminyakeni eyishumi nesishiyagalombili kamuva uJesu wabhapathizwa wayeseqalisa umsebenzi wokushumayela nokufundisa ngoMbuso uNkulunkulu ayemthumele ukuba awenze emhlabeni. Ukuze amsize kulo msebenzi, uJesu wakhetha amadoda ayi-12 wawenza abaphostoli bakhe.

UJesu futhi wenza izimangaliso eziningi. Wasuthisa izinkulungwane zabantu ngezinhlanzi ezimbalwa nje nezinkwa. Wasindisa abagulayo wavusa ngisho nabafileyo. Ekugcineni, sifunda ngezinto eziningi ezenzeka kuJesu ngosuku lokugcina lokuphila kwakhe, nokuthi wabulawa kanjani. UJesu washumayela iminyaka ethi ayibe mithathu nengxenye, ngakho INGXENYE 6 ihlanganisa isikhathi esingaphezuywana kweminyaka engu-34.