TALUA klanman nga suan Mali. Ɔ ti Izraɛli bla yɛ ɔ tran Nazarɛti. Ɲanmiɛn si kɛ ɔ ti sran kpa. I ti yɛ ɔ sunmɛnnin i anzi Gabliɛli kɛ ɔ ko kan ndɛ kle i ɔ. ?Amun si ndɛ nga anzi Gabliɛli ko kan kleli Mali’n? Amun e nian ndɛ sɔ’n.

Anzi Gabliɛli yoli i like yɛ ɔ seli i kɛ: ‘Ɔ liɛ su ti ye! Maan e Min Zoova jran ɔ sin!’ Sran sɔ’n, Mali nin a wunmɛn i le. Ɔ maan i angunndan’n sanngannin, afin ndɛ nga anzi’n kannin’n, ɔ wunmɛn i wlɛ. Sanngɛ srɛ m’ɔ kun i ti’n, anzi Gabliɛli guɛli i awlɛn su nzue.

Ɔ seli i kɛ: ‘Mali, nán srɛ kun wɔ, afin Ɲanmiɛn Zoova a bu wɔ sran. I ti yɛ ɔ su wa yo abonuan sa kun mán wɔ ɔ. Á wá wú ba yasua kun, yɛ á tɔ́n i dunman Zezi.’

Anzi Gabliɛli yiyili nun ekun seli kɛ: ‘Ba sɔ’n yó sran dan, bé flɛ́ i kɛ Ɲanmiɛn mɔ like fi nunmɛn i sin’n i Wa. Zoova síe i famiɛn kɛ Davidi sa. Sanngɛ Zezi ká famiɛn tititi, yɛ i Sielɛ Blɛ’n ɔ leman awieliɛ!’

Mali usɛli i kɛ: ‘?Kɛ mɔ n siman yasua’n, ɔ́ yó sɛ yɛ sa sɔ’n kwla yo ɔ?’

Anzi Gabliɛli tɛli i su kɛ: ‘Ɲanmiɛn wawɛ’n ɔ́ bá ɔ wun. I sɔ’n ti’n, ba’n mɔ á wú i’n, bé flɛ́ i Ɲanmiɛn Wa.’ Kpɛkun, ɔ seli Mali ekun kɛ: ‘Nian, Elizabɛti m’ɔ ti ɔ osufuɛ’n, w’a wunnzɛ i kpɛnngbɛn ba; bla sɔ’n mɔ be flɛ i klun kpanfuɛ’n, w’a wunnzɛ. Afin, sa kwlaa nga Ɲanmiɛn waan ɔ́ yó’n, ɔ kwlɛ i yo.’

Ɔ maan ndɛndɛ Mali seli kɛ: ‘Min yɛ, n ti Zoova i afanniɛn, Ɲanmiɛn nin ɔ nuan fɛ.’ Kpɛkun, yɛ anzi yacili i lɛ ɔli ɔ.

Kɛ ɔ yoli sɔ’n, w’a cɛman yɛ Mali wɔli Elizabɛti wun wunlɛ ɔ. Kɛ Elizabɛti tili Mali i nɛn’n, aklunjuɛ ti’n ba m’ɔ o i klun’n jaojaoli. Ɲanmiɛn wawɛ’n wluli Elizabɛti nun yɛ ɔ seli Mali kɛ: ‘Eee, mmla’m be nun’n, Ɲanmiɛn a bu wɔ sran.’ Mali dili anglo ko ju nsan Elizabɛti i wun lɔ, i sin naan w’a sɛ i sin Nazarɛti.

Bian nga ɔ fata kɛ Mali jɛ i’n, yɛle Zozɛfu. Sanngɛ, kɛ Zozɛfu tili kɛ Mali a wunnzɛ’n, i waan ɔ jɛmɛn i kun. Kɛ ɔ yoli sɔ’n, Ɲanmiɛn i anzi kun seli Zozɛfu kɛ: ‘Nán srɛ kun wɔ, fa ɔ yi Mali kɔ ɔ bo, afin ba’n mɔ w’a wunnzɛ i’n ɔ fin Ɲanmiɛn.’ I sɔ’n ti’n, Zozɛfu nin Mali be jali be wun. Siɛn’n nga be minndɛ i’n, yɛle Zezi i awuliɛ.