Stori 84: Wan Enjel i Toktok Long Meri
NAESFALA woman ya, hem i Meri. Hem i wan woman Isrel we i stap long taon ya Nasaret. God i save se Meri i wan gudfala woman, taswe hem i sanem enjel Gabriel i kam toktok long Meri. ?Gabriel i talem wanem long Meri? Bambae yumi luk.
Gabriel i talem se: ‘Halo Meri. Jeova i mekem i gud tumas long yu, mo hem i stap wetem yu.’ Meri i no bin luk man ya samtaem. Tingting blong hem i trabol tumas long tok ya, mo hem i stap traem blong tingbaot, from wanem enjel ya i toktok long hem olsem. Be Gabriel i mekem tingting blong hem i kam kwaet.
Hem i se: ‘Meri, yu no fraet. Jeova i glad long yu. From samting ya, bambae hem i mekem i gud tumas long yu. Bambae yu yu bonem wan pikinini boe blong yu, mo bambae yu putum nem blong hem, se Jisas.’
Gabriel i gohed se: ‘Hem bambae i wan haeman, mo ol man bambae oli save singaot hem, se Pikinini blong God ya we i hae we i hae. Jeova bambae i mekem hem i king, olsem Deved bifo. !Jisas bambae i king gogo i no save finis, mo kingdom blong hem bambae i stap olwe!’
Meri i askem se: ‘?Bambae samting ya i save kamtru olsem wanem? Mi mi no mared. Mi mi no stap wetem wan man yet. ?Olsem wanem mi save gat wan pikinini?’
Gabriel i talem se: ‘Paoa blong God bambae i kam long yu. Nao from samting ya, ol man bambae oli save singaot pikinini ya, se Pikinini blong God.’ Nao hem i talem long Meri se: ‘Yu save woman ya Elisabet, we i wan famle blong yu, hem i olfala finis, be hem i gat bel. Oli stap talem se hem i no save karem pikinini, be i no longtaem bambae hem i karem wan pikinini boe blong hem. Yu luk, i no gat wan samting we i strong tumas, we God i no save mekem.’
Wantaem nomo, Meri i talem se: ‘!Mi mi gel blong wok nomo blong Jeova! Mi wantem blong i kamtru long mi olsem we yu yu talem.’ Nao enjel ya i gowe long hem.
Biaen i no longtaem, Meri i aot long ples blong hem, i wokbaot hareap blong go luk Elisabet. Taem Elisabet i harem voes blong Meri, pikinini we i stap long bel blong hem, i muv from we hem i glad tumas. Nao Elisabet i kam fulap long tabu spirit, mo i talem se: ‘Meri. God i blesem yu moa i winim ol narafala woman.’ Nao Meri i stap tri manis wetem Elisabet, mo biaen hem i gobak long Nasaret bakegen.
Oli blokem Meri finis se bambae hem i mared long man ya Josef. Be taem Josef i faenemaot se Meri i gat bel, hem i no ting se i stret we tufala i mared. Be enjel blong God i talem long Josef se: ‘Yu no fraet blong tekem Meri, blong i woman blong yu, from we God nomo i mekem we hem i gat bel mo bambae hem i bonem wan boe.’ Ale Meri mo Josef i mared mo tufala i wet blong Meri i bonem Jisas.
Luk 1:26-56; Matiu 1:18-25.
Ol Kwestin
- ?Woman long pija ya hem i hu?
- ?Gabriel i talem wanem long Meri?
- ?Olsem wanem Gabriel i eksplenem samting we bambae i hapen blong mekem se Meri i save gat pikinini nating se hem i no stap wetem wan man?
- ?Wanem i hapen taem Meri i go luk wan famle blong hem Elisabet?
- ?Wanem tingting blong Josef taem hem i faenemaot se Meri i gat bel? ?Be from wanem hem i jenisim tingting blong hem?
Sam narafala kwestin
- Ridim Luk 1:26-56.
?Luk 1:35 i soem se, taem God i putum laef blong spirit Pikinini blong Hem i go long bel blong Meri, olsem wanem long sin we i stap long bodi blong Meri? (Hag. 2:11-13; Jon 6:69; Hib. 7:26; 10:5)
?Olsem wanem Jisas i kasem ona bifo we hem i bon? (Luk 1:41-43)
?Wanem gudfala eksampol we Meri i soem long ol Kristin tede we oli kasem spesel wok? (Luk 1:38, 46-49; 17:10; Prov. 11:2)
- Ridim Matiu 1:18-25.
?Nating se oli no putum nem ya Emanuel long Jisas, olsem wanem hem i soemaot mining blong nem ya? (Mat. 1:22, 23; Jon 14:8-10; Hib. 1:1-3)
