Maana 84nan

Mɛlɛkɛ nana Mariyama fɛ

NIN muso cɛɲi ye Mariyama de ye. Israɛlkaw dɔ don. A sigilen bɛ Nazarɛti dugu kɔnɔ. Ala b’a dɔn ko mɔgɔ ɲumanba don. O kosɔn, a ye mɛlɛkɛ Gabriɛl ci a ma ka kuma a fɛ. I b’a dɔn Gabriɛl nana min fɔ Mariyama ye wa? An k’o lajɛ ɲɔgɔn fɛ.

Gabriɛl ko a ma: ‘I ni sɔgɔma. Bonyaba dara i kan. Jehova bɛ i fɛ.’ Mariyama tun ma deli ka o cɛ ye. A kɔnɔnafilila bawo a tun t’a dɔn cɛ tun b’a fɛ ka min fɔ. Nka, o yɔrɔnin bɛɛ la, Gabriɛl ye Mariyama hakili latigɛ.

A ko: ‘I kana siran Mariyama, i ko diyara Jehova ye. O de kosɔn a bɛna dakabanakoba kɛ i ye. Yan ni dɔɔnin cɛ, i bɛna den sɔrɔ. I ka a tɔgɔ da ko Yesu.’

Gabriɛl y’a fɔ tuguni, ko: ‘O den bɛna kɛ mɔgɔba ye. A bɛna wele ko Ala Kɔrɔtalenba denkɛ. Jehova bɛna a kɛ masakɛ ye i ko Dawuda tun ye masakɛ ye cogo min na. Nka, Yesu bɛna kɛ masakɛ ye badaa-badaa. Dan tɛna kɛ a ka masaya la.’

Mariyama y’a ɲininka ko: ‘O ko bɛɛ bɛ se ka kɛ cogo di k’a sɔrɔ ne ma furu? Ne sigilen tɛ cɛ kun fana. Ne bɛ se ka o den sɔrɔ cogo jumɛn na?

Gabriɛl y’a jaabi ko: ‘Ala ka setigiya bɛna na i kan. O kosɔn, den bɛna wele ko Ala Denkɛ.’ Gabriɛl y’a fɔ fana ko: ‘I hakili jigin i balimamuso Elisabɛti la. Mɔgɔw tun ko a kɔrɔla den sɔrɔ ma. Nka, sɔɔni a bɛna jigin denkɛ la. I ko i y’a ye cogo min na, Ala tɛ dɛsɛ ko si la.’

O yɔrɔnin bɛɛ la, Mariyama ko: ‘Ne ye Jehova ka jɔnmuso ye. I y’a fɔ cogo min na, a ka kɛ ten.’ O la, mɛlɛkɛ taara.

Mariyama y’i teliya ka taa bɔ Elisabɛti ye. Elisabɛti ye Mariyama kan mɛn tuma min na dɔrɔn, den min bɛ Elisabɛti kɔnɔ, o panna nisɔndiya bolo. Elisabɛti fara Ala ka hakili senu la. A ko Mariyama ma: ‘I ye dubaden kɛrɛnkɛrɛnnen ye musow cɛma.’ Mariyama tora Elisabɛti fɛ kalo saba ɲɔgɔn. O kɔfɛ, a seginna a ka so Nazarɛti.

 Mariyama tun bɛna furu cɛ min ma, o tun tɔgɔ ye ko Yusufu. Nka, Yusufu y’a mɛn tuma min na ko Mariyama bɛna den sɔrɔ, a y’a miiri ko ale man kan ka Mariyama furu tun. O de y’a to Ala ka mɛlɛkɛ y’a fɔ Yusufu ye ko: ‘I kana siran ka Mariyama ta ka a kɛ i muso ye, bawo Ala de ye denkɛ di a ma.’ O cogo la Mariyama ni Yusufu furula ɲɔgɔn ma, ka Yesu wololi makɔnɔ.

Luka 1:​26-56; Matiyu 1:​18-25.