MWANA-PWO au mupema chize jina lienyi Maria. Iye te Ka-Izalele, te katwama mu mbonge ya Nazare. Zambi te kananyingika ngwo iye kali mwana-pwo mupema chinji. Kashika iye yatuma mungelo wenyi Gabriele hanga ahanjike nenyi. Yena unanyingika yika yize Gabriele ambile kuli Maria? Tutalenu.

Gabriele yamba kuli iye ngwenyi: ‘Menekenu, Yena hanakuwahisa. Yehova kali hamwe ni yena.’ Maria te kanda achimona kama mutu wacho. Iye yalihulumba chinji, mumu te kaso kunyingika yize mungelo anambe. Alioze, Gabriele yamuhumikiza hanga achine kwiva woma.

Iye yamwamba ngwenyi: ‘Kanda wivwa woma Maria. Yehova kanawahilila chinji ni yena. Kashika iye malinga chimwe chikomokeso hali yena. Yena mukasema umwe mwana. Nawa mukamuluka jina ngwo Yesu.’

Gabriele yamba nawa ngwenyi: ‘Mwana wacho makapwa ni ulemu, nawa makamuvuluka ngwo Mwana wa Zambi, Mwe Chitunda. Yehova makamusa mwanangana, ngwe Ndawichi. Mba alioze, Yesu makapwa mwanangana wa miaka eswe, nawa wanangana wenyi kuuchi kahwa!’

Maria yahula ngwenyi: ‘Kuchi chino muchihasa kupwa? Yami kanda achingumbata? Nawa yami kanda nguchilimona ni lunga. Kuchi mba munguhasa kupwa ni mwana?’

Gabriele yakumbulula ngwenyi: ‘Ndundo ja Zambi mujikeza hali yena. Kashika mwana wacho makamuvuluka ngwo Mwe Mwana wa Zambi.’ Hohene iye yalweza Maria ngwenyi: ‘Euluka usoko we Izabele. Atu kapwile ni kumwamba ngwo kechi kusema mwana mumu te iye hakola chinji. Alioze kwasala hakehe iye mapwa ni mwana. Kashika, tala, kuli Zambi kushi nichimwe chuma chikalu kulinga.’

Maria yamba ngwenyi: ‘Yami nguli ndungo wa Yehova! Chikapwe kuli yami nikulita ni yize yena wamba.’ Mba mungelo yaya kwenyi.

Maria yaya kafujifuji ni kumeneka Izabele. Muze Izabele yevwa liji lia Maria, mwana-kemba te uli mujimo lia Izabele yatumbuka ni chiseke. Izabele yazala too ni spiritu ya Zambi, mba iye yamba kuli Maria ngwenyi: ‘Yena kuwawaha mukachi ka mapwo. Maria yatwama hamwe ni Izabele tukweji atatu, mba yahiluka ku zuwo lienyi ku Nazare.

Te hi kwasala hakehe hanga Maria amumbate kuli umwe lunga yoze anavuluka ngwo Yosefwe. Mba muze Yosefwe yanyingika ngwo Maria ku mapwa ni umwe mwana, iye yanyonga ngwo chatambile kulimbata nenyi. Hohene mungelo wa Zambi yamba kuli iye ngwenyi: ‘Kanda wivwa woma wa kumbata Maria hanga apwe mukwenu-pwo. Mumu, Zambi mwe wamwaha mwana wacho.’ Kashika Maria ni Yosefwe yalimbata, mba ayo yashimbwila kusemuka cha Yesu.