SA ZOLI madanm i apel Mari. I en Izraelit, ki ti reste dan lavil Nazaret. Bondye ti konnen ki i ti en bon dimoun. Se pour sa rezon ki i ti anvoy son lanz, Gabriyel, pour koz avek li. Eski ou konnen ki lanz Gabriyel ti vin dir Mari? Annou vwar.

‘Rezwir, ou ki’n ganny faver Bondye,’ lanz Gabriyel ti dir. ‘Zeova i avek ou.’ Mari pa ti’n zanmen vwar sa dimoun avan. I ti enkyet, akoz i pa ti konnen ki sa lanz ti oule dir. Me toudswit lanz Gabriyel ti kalme li.

‘Pa bezwen per, Mari,’ i ti dir. ‘Zeova i kontan ou. Se pour sa ki i pe al fer en keksoz merveye pour ou. Ou pou ganny en pti baba. E ou pou apel li Zezi.’

Gabriyel ti kontinyen eksplike: ‘Sa pti baba pou gran, e i pou ganny apele Garson Bondye Tre O. Zeova pou fer li vin lerwa, parey David ti ete. Me Zezi pou vin lerwa pour touzour, e son rwayonm pa pou zanmen fini!’

‘Ki mannyer sa pou arive?’ Mari ti demande. ‘Mon pa ankor marye. Mon pa’n deza reste avek en msye, alor konman ki mon kapab ganny en pti baba?’

‘Lespri sen pou desann lo ou,’ Gabriyel ti reponn. ‘Alor sa pti baba pou apel Garson Bondye.’ Apre sa, i ti dir avek Mari: ‘Mazin ou fanmiy Elizabet. Dimoun ti pe dir ki i tro vye pour ganny en pti baba. Me dan en pe letan i pou ganny en pti garson. Alor ou vwar, napa nanryen ki Bondye pa kapab fer.’

Deswit Mari ti dir: ‘Mwan, mon serviter Zeova, les ariv avek mwan parey ou’n dir.’ Apre sa lanz ti ale.

Mari ti degaze e al vizit Elizabet. Kan Elizabet ti antann lavwa Mari, sa pti baba dan son vant ti sote avek lazwa. Elizabet ti ranpli avek lespri sen Bondye, e i ti dir avek Mari: ‘Ou’n ganny beni parmi bann madanm.’ Mari ti reste avek Elizabet pour apepre 3 mwan, e apre i ti retourn kot li Nazaret.

Mari ti pros pour marye avek en zonm ki ti apel Zozef. Me kan Zozef ti aprann ki Mari ti pe al ganny en pti baba, i ti panse ki i pa merit marye avek li. Apre lanz Bondye ti dir avek li: ‘Pa bezwen per pour pran Mari konman ou madanm. Akoz se Bondye ki’n donn li sa garson.’ Alor Mari ek Zozef ti marye, e zot ti esper Zezi ne.