NA YALEWA totoka oqo o Meri. E dua na Isireli o koya, e tiko ena koro o Nasareci. E kila na Kalou ni o koya e yalewa vinaka. Oya na vuna e tala kina na nona agilosi o Keperieli me vosa vua. O kila na cava e mai tukuna o Keperieli vei Meri? Meda raica mada.

E kaya o Keperieli vua: ‘Sa bula vinaka o iko sa daulomani. Sa tiko kei iko o Jiova.’ E se bera mada ga ni bau sotavi koya vakadua o Meri, e lomaleqa vakalevu ni sega ni kila na ibalebale ni ka e tukuna. Ia e vukei koya na agilosi me kua ni rere.

E kaya: ‘Kua ni taqaya, Meri. E taleitaki iko dina o Jiova. Ena vakayacora vei iko e dua na ka vakurabui. Ena dua na luvemu, ia mo vakayacani koya o Jisu.’

Sa qai vakamacalataka tale o Keperieli: ‘Ena levu na gone oqo, ena vakatokai me Luve ni Kalou sa Cecere Sara. Ena buli koya o Jiova me tui me vakataki Tevita ga. Ia ena tui tawamudu o Jisu, ena sega ni oti na nona matanitu.’

E taroga o Meri: ‘Ena rawa vakacava na ka kece oqo? Au se sega ni vakawati. Au na sega ni rawa ni vakaluveni.’

E sauma o Keperieli: ‘Ena yaco vei iko na kaukaua ni Kalou. Ena vakatokai kina me Luve ni Kalou.’ E tomana: ‘Nanuma na wekamu o Ilisapeci ena nona kaya ni sa rui qase qai sega ni rawa ni vakaluveni. Ia sega ni dede sa na dua na luvena. O koya gona e sega ni dua na ka me dredre vua na Kalou.’

Oti sa qai kaya o Meri: ‘O yau na yalewa bobula i Jiova! Me yaco vei au na veika oni kaya.’ Sa qai lako na agilosi.

E lako totolo sara yani o Meri me lai sikovi Ilisapeci. Ni qai rogoca ga na domo i Meri o Ilisapeci, e rika sara ena reki na gone e tiko i ketena. E sobuti Ilisapeci na yalo tabu ni Kalou qai kaya vei Meri: ‘O sa kalougata dina vei ira na yalewa.’ E tiko e kea o Meri me vula tolu qai lesu tale i Nasareci.

Rau a sa veivosaki oti tu me rau veiwatini o Meri kei na dua na turaga o Josefa. Ia ni qai kila o Josefa ni sa na dua na luve i Meri, e nanuma ni sega ni dodonu me vakawatitaki koya. Sa qai kaya vua na agilosi ni Kalou: ‘Kua ni rere, mo tauri Meri me watimu ni a solia vua na Kalou e dua na gone tagane.’ Erau sa qai vakamau me rau waraka kina na sucu i Jisu.