NƐKƐ yoo fɛfɛo nɛɛ ji Maria. Israel yoo ji lɛ, ni Nazaret maŋ lɛ mli eyɔɔ. Nyɔŋmɔ le akɛ eji gbɔmɔ kpakpa waa. No hewɔ ni etsu ebɔfo Gabriel kɛba koni ekɛ lɛ abawie lɛ. Ani ole nɔ ni bɔfo Gabriel eba ni ebaakɛɛ Maria lɛ? Ha wɔkwɛ.

Gabriel kɛɛ lɛ akɛ: ‘Hejɔlɛ aha bo, bo mɔ ni ajɔɔ bo. Yehowa kɛ bo yɛ.’ Maria enako gbɔmɔ nɛɛ dã. Ehao, ejaakɛ enuuu nɔ ni ekɛɔ lɛ lɛ shishi. Shi amrɔ nɔŋŋ kɛkɛ ni Gabriel jie egbeyeishemɔ lɛ yɛ jɛmɛ.

Ekɛɛ lɛ akɛ: ‘Kaashe gbeyei, Maria, ejaakɛ ohiɛ eba nyam yɛ Yehowa hiɛ. No hewɔ ni ebaafee naakpɛɛ nɔ ko eha bo lɛ. Etsɛŋ ni obaafɔ bi. Ni obaatsɛ egbɛi akɛ Yesu.’

Gabriel tee nɔ etsɔɔ mli akɛ: ‘Gbekɛ nɛɛ baatsɔ agbo, ni abaatsɛ lɛ Ŋwɛi Flooflo Nyɔŋmɔ lɛ Bi. Yehowa baafee lɛ maŋtsɛ, tamɔ bɔ ni David ji lɛ. Shi Yesu baafee maŋtsɛ kɛya naanɔ, ni emaŋtsɛyeli lɛ baŋ naagbee!’

Maria bi akɛ: ‘Te aaafee tɛŋŋ ni enɛ aaaba mli hu? Miboteko gbalashihilɛ mli po. Mikɛ nuu ko ehiko shi, hewɔ lɛ te mafee tɛŋŋ mafɔ hu?’

Gabriel ha lɛ hetoo akɛ: ‘Nyɔŋmɔ hewalɛ lɛ aaaba onɔ. No hewɔ lɛ abaatsɛ gbekɛ lɛ akɛ Nyɔŋmɔ Bi.’ Kɛkɛ ni ekɛɛ Maria akɛ: ‘Kaimɔ owekunyo Elisabet. Mɛi wie akɛ éda tsɔ̃ fe bɔ ni ebaanyɛ efɔ bii. Shi amrɔ nɛɛ etsɛŋ ni ebaafɔ binuu. No hewɔ lɛ oona, nɔ ko bɛ ni Nyɔŋmɔ nyɛŋ afee.’

Amrɔ nɔŋŋ kɛkɛ ni Maria kɛɛ akɛ: ‘Yehowa tsulɔyoo ji mi! Bɔ ni okɛɛ lɛ aba mli nakai yɛ migbɛfaŋ.’ Kɛkɛ ni bɔfo lɛ tee.

Maria kɛ oyaiyeli tee eyasara Elisabet. Beni Elisabet nu Maria gbee lɛ, abifao ni yɔɔ Elisabet musuŋ lɛ huru kɛ miishɛɛ. Nyɔŋmɔ mumɔ yi Elisabet obɔ, ni ekɛɛ Maria akɛ: ‘Ajɔɔ bo waa yɛ yei ateŋ.’ Maria kɛ Elisabet hi shi aaafee nyɔji etɛ, ni no sɛɛ lɛ eku esɛɛ kɛtee shia yɛ Nazaret.

Eshwɛ fioo ni Maria kɛ nuu ko ni atsɛɔ lɛ Yosef baabote gbalashihilɛ mli. Shi beni Yosef nu akɛ Maria ena musu lɛ, esusu akɛ esaaa akɛ ekɛ lɛ hiɔ shi dɔŋŋ. Kɛkɛ ni Nyɔŋmɔ bɔfo lɛ kɛɛ lɛ akɛ: ‘Kaashe gbeyei akɛ okɛ Maria aaahi shi akɛ oŋa. Ejaakɛ Nyɔŋmɔ ji mɔ ni eha lɛ binuu lɛ.’ No hewɔ lɛ Maria kɛ Yosef bote gbalashihilɛ mli, ni amɛmɛ koni afɔ Yesu.