TÜ JIETKAT María sünülia. Israeliita shia, kepiasü Nazaret. Nütüjaa aaʼu Maleiwa anain maʼin sukuwaʼipa. Nuluwataaka chi aapieekai Gabriel süpüla naashajaain sümaa. ¿Pütüjaa aaʼu jamüsü nünüiki sümüin? Wekirajaa sünain.

Müshi nia sümüin: ‹¿Jamayaa pia? Eeshi Maleiwa pümaa süka kojutuin maʼin pia nutuma›. Nnojoishi shiʼraajüin nia. Ainkuusü saaʼin süka nnojoluin sütüjaain aaʼu jamaluʼuluin nünüiki.

Nümaka Gabriel: ‹Nnojo mmoluin pia, talatüshi Jeʼwaa pümaa. Nüneeküin pia süpüla wanee kasa anasü. Ipuoleerü pia. Jesús, shia nünüliainjatka chi joʼuukai putuma›.

Nümaka Gabriel: ‹Kojutushaateechi chi joʼuukai, Nüchon chi Maleiwa Miyoʼushikai müneechi. Aluwataainjachi nia nutuma Jeʼwaa maʼaka naaʼin David. Aluwataainjachi nia waneepia›.

Sümaka María: ‹¿Jamüinjatü takuwaʼipa süpüla kachoin taya sümaa nnojoluin nünainpünaain taya wayuu toolo?›

Nümaka Gabriel: ‹Nuluwataainjachi Maleiwa chi naaʼinkai pünainmüin süpüla Nüchon Maleiwa nümünüinjachin chi joʼuukai. Soto paaʼin Elisabet, tü laülaakat süpüla kachoin saashin wayuu, ipuotsü shia. Shiimüin nnojoluin kasain isain nüchiki Maleiwa›.

Sümaka María: ‹Aʼyataalü taya nümüin Jeʼwaa. Anasü naaʼinrüle taka tü püküjakat achiki tamüin›. Nuʼunaka chi aapieekai.

Suʼunaka María eemüin Elisabet. Saapaiwaʼaya Elisabet sünüiki María, akutulaashi chi süchonkai süleʼeruʼu. Antüshi chi naaʼinkai Maleiwa saaʼu Elisabet, sümaka: ‹Anataʼaleesüjaʼa maʼin pia suulia jieyuu maleekalia›. Apünüin kashi María sümaʼana Elisabet, mapa süleʼejaka shipialuʼumüin.

Kasaalüinjatü María nümaa José. Akatsaʼa nütüjaapa saaʼu ipuoluin shia, nnojoika kasaaleein nia sümaa. Nümaka wanee aapiee nümüin: ‹José, nnojo mmoluin pia saaʼu puʼwayuusein María. Ipuotsü shia sutuma nüpülain chi naaʼinkai Maleiwa›. Kasaatka José sümaa María, naʼatapaka jemein Jesús.