INAI hahine hairaina be Maria. Ia be Nasareta hanuana dekenai ia noho Israela kekenina ta. Dirava ia diba ia be kekeni namona. Unai dainai ena aneru Gabriela ia siaia ia hereva henia totona. Oi diba Gabriela be Maria dekenai dahaka sivaraina ia mailaia? Mani ita itaia.

Gabriela be ia dekenai ia gwau: ‘Dina namona, iena lalokau kekenina e. Iehova be oi danu ia noho.’ Maria be guna unai tauna ia itaia lasi. Ia laloa momo, badina ena hereva ena anina ia diba lasi. To maoromaoro Gabriela ese ena gari mamina ia kokia.

Ia gwau: ‘Maria e, oi gari lasi. Iehova be oi dekenai ia moale. Unai dainai, hoa karana ta oi dekenai do ia karaia. Daudau lasi mero ta do oi havaraia. Bona ena ladana do oi gwauraia Iesu.’

Gabriela ma ia gwau: ‘Inai mero be do ia hereadae. Bona ia be Ataiai Momokani Diravana ena Natuna do idia gwauraia. Iehova ese ia be king ai do ia halaoa, Davida bamona. To Iesu do ia lohia ela bona hanaihanai, bona ena basileia do ia ore diba lasi.’

Maria ia henanadai: ‘Edena bamona unai ibounai do idia vara. Lau be lau headava lasi. Tau ta danu lau noho lasi. Unai dainai mero be edena bamona do lau abia?’

Gabriela ia haere: ‘Dirava ena siahu be oi dekenai do ia diho dainai, mero be Dirava ena Natuna do idia gwauraia.’ Bena Maria ia hamaoroa: ‘Emu varavara Elisabeta mani oi laloa. Ia be buruka herea dainai taunimanima idia gwau natuna ia havaraia diba lasi. To kahirakahira mero ta do ia abia. Unai dainai oi diba, Dirava be gau ibounai ia karaia diba.’

Maoromaoro Maria ia gwau: ‘Lau be Iehova ena hesiai kekenina! Oiemu hereva hegeregerena lau dekenai do ia vara.’ Bena aneru ia lao.

Maria be Elisabeta dekenai ia lao haraga. Elisabeta be Maria ena gadona ia kamonai neganai, ena bogana lalonai ia noho merona be mai moale ida ia roho. Elisabeta be Dirava ena lauma ese ia hahonua bona Maria ia hamaoroa: ‘Hahine ibounai edia huanai, oi ia hanamoa bada.’ Maria be hua toi Elisabeta ida ia noho, bena Nasareta dekenai ia giroa.

Maria be tau ta ladana Iosepa, ia adavaia gwauraia. To Iosepa ia kamonai Maria be natuna ta do ia havaraia neganai, ia laloa ia adavaia be maoro lasi. Bena Dirava ena aneru ese ia hamaoroa: ‘Oi gari lasi. Maria oi abia emu adavana ai do ia lao. Badina Dirava ese ia dekenai mero ia henia.’ Unai dainai, Iosepa bona Maria idia headava bona Iesu ena vara negana idia naria.