Omuengeli ma varura Maria
EHUNGI 84
Omuengeli ma varura Maria
OMUKAZENDU omuwa ngwi oMaria. Eye Omuisrael, ngwa turire motjihuro tjaNasaret. Mukuru aa tjiwa kutja Maria omundu omuwa tjinene. Kunao eye opa zokuhinda omuengeli we okuyekuhungira kuna ye. Ove mo tjiwa kutja otjikwaye Gabriel tje yokuhungira ku Maria? Indjeye tu tare.
Gabriel wa tjere ku ye: ‘Minikwa, muingona. Jehova u ri puna ove.’ Maria ke ya rora okumuna omundu ngwi momuinyo we. Eye ee rikende, orondu tje ha ri ama tjiwa kutja omuengeli aa heye tjike. Nungwari tjimanga Gabriel wa wisa omutima we pehi.
Neye arire tja tja: ‘O tira Maria. Ove wa munu ondjingonekero ku Jehova. Neye opu ma zokukutjitira otjiṋa otjinanḓengu tjinene. Ove mo panduka omuatje. Nena re mu ruka Jesus.’
Gabriel wa kayenda komurungu okumuraera na tja: ‘Omuatje ngwi ma rire omunene, neye ma isanewa Omuna waMukuru Wokombandambanda. Jehova me mu tjiti ombara, otja David tja ri ombara. Nungwari Jesus ma karerere ombara ngaaruhe, nouhona we kamaau yanda ko!’
Maria wa pura na tja: ‘Otjiṋa hi matji tjitwa vi? Ami nandarire hi ya kupwa. Hi ya rora okuhakaena ku nomurumendu, nambano me yenene vi okupanduka?’
Gabriel we mu zira na tja: ‘Omasa waMukuru maye ya kombanda yoye. Okutja omuatje ma isanewa omuna waMukuru.’ Okuzambo wa raera Maria na tja: ‘Zemburuka omuzamumwe woye Elisabet. Ovandu aave tja eye wa kurupire tjinene okupanduka omuatje. Nungwari mokaruveze okasupi eye ma panduka omuatje omuzandu. Ove nambano mo munu kutja Mukuru ke notjiṋa tji tje mu ura.’
Tjimanga Maria wa tja: ‘Owami omukarere waJehova! Ngape tjitwe ku ami otja ove pu wa heye.’ Okuzambo omuengeli wa zapo.
Maria wa hakahana okuyenda ku Elisabet. Indu Elisabet tja zuva eraka raMaria, okanatje mezumo re katuka peyuru nenyando. Elisabet we urisirwe nombepo yaMukuru, na tja ku Maria: ‘Ove oove omuyozikwa mokati kovakazendu.’ Maria wa kara puna Elisabet oure womieze ngahino vitatu, okuzambo wa yaruka konganda ku Nasaret.
Maria wa ri pookukupwa i omurumendu wena Josef. Nungwari indu Josef tja zuva kutja Maria otjingundi, eye ee ripura kutja ke nakumukupa ko. Okutja omuengeli waMukuru wa tja ku ye: ‘O tira okuisapo Maria omukazendu woye. Orondu Mukuru ongwe mu pe omuzandu we.’ Okutja Maria na Josef va kupa, nave undju kutja Jesus ma pandukwe.
Mo yenene okutara ku imbi wina
HOREREYE KONGAMBURIRO YAWO
Maria—“Owami omukarere waMuhona”
Eziriro Maria nda yandja komuengeli Gabriel ri raisa tjike ohunga nongamburiro ye? Ovikaṋena viṋe vyarwe oviwa eye mbya raisa?
