Yerza lmelk ɣef Meryem
TAQSIṬ TIS 84
Yerza lmelk ɣef Meryem
TILEMẒIT-AGI icebḥen isem-is Meryem. D yiwet seg wegdud n Isṛayil izedɣen di temdint n Naṣaret. Ṛebbi yeẓra ţ-ţameṭṭut n lɛali i tella. Ɣef wannect-a i gceggeɛ Ṛebbi lmelk-is Jebrayil iwakken ad ihdeṛ yid-es. Teẓriḍ d acu yenna Jebrayil i Meryem? Dayen ara nwali tura.
Jebrayil yenna-yas: ‘Sslam fell-am a tin iburek Ṛebbi. Yahwa yella yid-em.’ Meryem ikcem-iţ lxuf axaṭer ur t-tessin ara yerna ur teẓri ara d acu i gebɣa. Lameɛna din din Jebrayil ikkes-as tugdi.
Yenna-yas: ‘Ur ţţagad ara a Meryem. Tɛeǧbeḍ aṭas i Yahwa. Ɣef waya ara m-ixdem yiwet n lḥaǧa yessewhamen. Qrib a d-tesɛuḍ aqcic, a s-tsemmiḍ Ɛisa.’
Jebrayil yessefhem-as: ‘Ad yesɛu ccan d ameqran, ad iţţusemmi Mmi-s n Ṛebbi Ɛlayen. Yahwa a t-yerr d agellid akken yella Dawed zik-nni. Lameɛna, Ɛisa, neţţa ad yili d agellid i dima yerna tagelda-s ur tfennu ara.’
Meryem testeqsa-t: ‘Amek ara d-iḍru yid-i wannect-a nekk ur zwiǧeɣ ara? Leɛmeṛ ɛaceɣ d wergaz, amek i zemreɣ ihi a d-sɛuɣ aqcic?’
Lmelk yerra-yas: ‘Tazmert n Sidi Ṛebbi a d-ters fell-am. Daymi aqcic-agi ad iţţusemmi Mmi-s n Ṛebbi.’ Yenna daɣen i Meryem: ‘Tecfiḍ ɣef Ilicaba, tin akken i m-iţţilin? Lɣaci nnan belli bezzaf meqqret di leɛmeṛ akken a d-tesɛu dderya. Meɛna aţţan tura qrib a d-tesɛu aqcic. Ihi akken i twalaḍ, ulac ayen iwumi ur izmir Sidi Ṛebbi.’
Imiren-nni kan Meryem tenna-yas: ‘Aql-i ţ-ţaqeddact n Sidi Ṛebbi, ad iḍru yid-i swaswa wayen i d-tenniḍ.’ Dɣa lmelk-nni yeǧǧa-ţ, iṛuḥ.
Meryem teṭṭef abrid s lemɣawla ɣer Ilicaba. Akken i tesla Ilicaba i ṣṣut n Meryem, yefrawes si lfeṛḥ llufan-nni yellan di tɛebbuṭ-is. Ilicaba teččuṛ d ṛṛuḥ iqedsen, dɣa tenna i Meryem: ‘Teţţubarkeḍ ger tlawin meṛṛa!’ Meryem teqqim ɣer Ilicaba azal n tlata wagguren d wamek i tuɣal ɣer temdint-is Naṣaret.
Meryem tella teţwaxḍeb i yiwen wergaz iţţusemman Yusef. Lameɛna asmi i gesla belli Meryem s tadist i tella, yekukra ad yezweǧ yid-es. Lmelk n Ṛebbi yenna-yas ihi: ‘Ur ţţagad ara aţ-ţesɛuḍ Meryem ţ-ţameṭṭut-ik axaṭer llufan yellan di tɛebbuṭ-is yusa-yas-d sɣur Ṛebbi.’ Yuɣal Meryem d Yusef zewǧen akken, ţṛaǧun talalit n Ɛisa.