NDAI tsawm la ai numsha gaw Mari re. Shi gaw Nazaret mare kaw nga ai, Israela numsha re. Grai kaja ai numsha langai mi re ai hpe Karai Kasang chye ai. Dai majaw lamu kasa Gabriela hpe shangun dat nna aga tsun shangun ai. Gabriela gaw Mari kaw sa nna hpa sa tsun ai hpe chye a ni? Yu yu ga.

‘A lu ai shani rai u ga; grai myi man pa ai numsha rai ndai; Yehowa nang hte rau rai nga ai,’ nga nna Gabriela gaw Mari hpe ga tsun ai. Mari gaw dai wa hpe shawng de nmu yu ai. Shi hpa ngu mayu ai hpe mung n chye ai majaw myit tsang mat ai. Raitimung Gabriela gaw dai shaloi jang shi hpe myit jasim ya ai.

‘Mari e, hkum hkrit et; Yehowa gaw nang hpe grai ra sharawng ai; Dai majaw na a matu mauhpa amu langai mi galaw ya na ra ai; Kade nna yang nang shadang sha langai mi shangai wa na ra ai. Shi hpe Yesu ngu nna amying shamying lu na ndai’ nga nna tsun ai.

‘Ndai ma gaw galu kaba wa na ra ai. Tsaw htum ai Karai Kasang a kasha ngu lu na re. Yehowa gaw shi hpe Dawi hpe zawn hkawhkam shatai na re. Raitimung Yesu gaw htani htana hkawhkam tai na ra ai. Shi a mungdan mung htum mat ngu ai nga na nrai,’ nga nna Gabriela gaw matut nna shaleng dan ai.

‘Mari gaw ‘kaning rai byin wa lu na a ta? ngai dinghku rai nshang sha shi ai. Ngai gaw ala hte rai nnga yu nngai. Kaning rai ama lu wa na kun? nga nna san ai.

Gabriela gaw, ‘Karai Kasang a hpung shingkang na a ntsa e, du na ra ai. Dai majaw shangai wa ai ma hpe Karai Kasang a kasha ngu lu na re,’ nga ai. Bai nna Mari hpe matut nna tsun ai: ‘Na a amyu Elisabet hpe yu yu u. Shi gaw kasha shangai na aten lai sai, nga nna masha ni tsun timung shi gaw kade nna yang shadang sha langai mi shangai wa na ra ai. Yu u, Karai Kasang e n shabyin lu ai hpa mung nnga ai’.

Dai rai nna Mari gaw shaloi jang, ‘Ngai gaw Yehowa a mayam num rai nga nngai. Madu nang tsun ai hte maren ngai hta byin wa u ga,’ nga ai. Dai hpang e, lamu kasa gaw pru mat wa ai.

Mari mung Elisabet kaw alawan sha sa wa ai. Mari a nsen hpe Elisabet na ai shaloi, Elisabet a hkritung na ma gaw gabu gumlawt nga ai. Elisabet mung Karai Kasang a wenyi, hte hpring nna Mari hpe tsun ai: ‘Numsha ni hta nang a lu ndai,’ nga ai. Mari gaw Elisabet hte rau shata masum daram nga nna Nazaret mare de bai nhtang wa ai.

Mari gaw Yosep ngu ai wa hte hkungran na sha rai sai. Raitimung Mari gaw kasha lu sana re ai lam hpe Yosep na ai shaloi, shi hpe nmai hkungran la sai nga nna myit kau ai. Dai shaloi Karai Kasang a lamu kasa gaw: ‘Mari hpe hkungran la na matu hkum hkrit u. Hpa majaw nga yang shi hpe ama jaw ai wa gaw Karai Kasang re,’ nga ai. Dai re ai majaw Yosep hte Mari hkan hkungran la ma ai. Bai nna Yesu shangai wa na aten hpe la nga ma ai.